សាលាដំបូងរាជធានីភ្នំពេញបានចេញដីការកោះហៅឲ្យលោក សម រង្ស៊ី ចូលខ្លួនបំភ្លឺពីបទញុះញង់ កុំឲ្យយោធិន ស្ដាប់បង្គាប់ និង ធ្វើឲ្យខូតទឹកចិត្តកងទ័ពដែលប្រព្រឹត្តកាលពីចុងឆ្នាំ ២០១៧។
ចៅក្រមស៊ើបសួរសាលាដំបូងរាជធានីភ្នំពេញ លោក ហម ម៉េងសែ បានចេញដីការមួយចុះថ្ងៃទី ២៣ ខែ កុម្ភៈ ដោយបង្គាប់ឲ្យលោក សម រង្ស៊ីចូលមកបំភ្លឺនៅតុលាការ នៅថ្ងៃទី ១៩ ខែ មីនានេះ វេលាម៉ោង ០៩ ព្រឹក ដើម្បីសាកសួរ។
តាមដីការដដែលនោះបានលើកឡើងថាលោក សម រង្ស៊ី ត្រូវបានចោទប្រកាន់ពីបទ ញុះញង់ កុំឲ្យយោធិន ស្ដាប់បង្គាប់ និង ធ្វើឲ្យខូតទឹកចិត្តកងទ័ព ដែលប្រព្រឹត្តនៅក្នុងរាជធានីភ្នំពេញ ហើយបទល្មើសនេះជាបទល្មើសព្រហ្មទណ្ឌ ដែលមានចែងក្នុងមាត្រា ៤៧១ និង មាត្រា ៤៧២ នៃក្រមព្រហ្មទណ្ឌ។
ក្នុងដីកាដដែលនោះតុលាការក៏បង្គាប់ឲ្យលោក សម រង្ស៊ី យកមកជាមួយនូវលិខិតផ្សេងៗបើមាន ដែលការពាក់ព័ន្ធនឹងសំណុំរឿងខាងលើ។
លោក សម រង្ស៊ី ដែលកំពុងនិរទ្ទេសខ្លួនបានទទួលរងនូវបណ្ដឹង ជាច្រើនពីគណបក្សប្រជាជន ដែលក្នុងនោះរាប់ទាំងបណ្តឹងរបស់ប្រធានរដ្ឋសភា លោក ហេង សំរិន ដែលប្តឹងពីបទបរិហារកេរ្តិ៍ជាសាធារណៈ និងបណ្តឹងលោកហ៊ុន សែន ដែលប្តឹងក្នុងបទចោទដូចគ្នានេះ។
ដីកាចុះថ្ងៃទី២៦ កុម្ភៈ សាលាដំបូងរាជធានីភ្នំពេញបានសម្រេចរឹបអូសទ្រព្យសម្បត្តិលោកសម រង្ស៊ី ដែលមានទីតាំងនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលជាអតីតទីស្នាក់ការបក្សសង្គ្រោះជាតិទុក រង់ចាំដល់សំណុំរឿងចប់ជាស្ថាពរ ដើម្បីត្រៀមលក់ឡៃឡុងសងលោក ហេង សំរិន និងលោក ហ៊ុន សែន៕