ប្រធានាធិបតីអាមេរិកលោក ដូណល ត្រាំ ចាប់ផ្តើមសង្គ្រាមពាក្យសម្តី លើពន្ធនាំចូល រថយន្តពីសហគមន៍អឺរ៉ុប។
លោកត្រាំ បានថ្លែងថា ប្រទេសនានាបានទទួលផលប្រយោជន៍ មិនស្មើភាពគ្នាពីសហរដ្ឋ អាមេរិកច្រើនឆ្នាំមកហើយ ដែលលោកថា នោះជាការធ្វើពាណិជ្ជកម្មបែប«ឆ្កួតលីលា»។
ជម្លោះជុំវិញការដំឡើងពន្ធនាំចូលនេះកើតឡើងតាំងពីថ្ងៃព្រហស្បតិ៍នៅពេលដែល លោក ត្រាំសម្រេចដំឡើងពន្ធនាំចូលដែកថែប២៥% និង អាលុយមីញ៉ូប១០%។ ការដំឡើងពន្ធនេះ នាំឲ្យដៃគូពាណិជ្ជកម្មរបស់អាមេរិកជាច្រើនផ្ទុះប្រតិកម្ម។ ការសម្រេចដំឡើងពន្ធរបស់អាមេរិកនេះ ក៏ទទួលរងការរិះគន់ពីIMF និងWTO។
ជាការសងសឹកជាមួយអាមេរិក សហគមន៍អឺរ៉ុប បានប្រកាសថា កំពុងតែពិចារណា ដំឡើង ពន្ធនាំទំនិញចូលពីអាមេរិកចំនួន២៥%ដែរ។
ប៉ុន្តែលោក ត្រាំ ព្រមានថា បើអឺរ៉ុបដំឡើងពន្ធនាំចូលពីអាមេរិកនោះ នោះលោក នឹងដំឡើង ពន្ធនាំរថយន្តពីអឺរ៉ុបចូលទៅវិញ។ បញ្ហានៅតែមានការប្រឈមមុខដាក់គ្នា នៅមិនទាន់មាន ដំណោះស្រាយរួមនៅឡើយ។