ចិនប្រកាសនៅថ្ងៃចន្ទនេះថា ថវិកាការពារជាតិនៅក្នុងឆ្នាំ២០១៨នេះ ត្រូវបង្កើនចំនួន៨,១% ជាការបង្កើនធំជាងគេលើពិភពលោក ខណៈកំណើនការចំណាយហាក់ថយចុះពីរឆ្នាំចុងក្រោយ។
តាមការប្រកាសរបស់ទីក្រុងប៉េកាំងឲ្យដឹងថា ថវិកានឹងចំណាយ១,១១ទ្រីលានយ័ន ឬស្មើនឹងប្រមាណ១៧៥ប៊ីលានដុល្លារ លើវិស័យកងទ័ព។ ការប្រកាសបង្កើនថវិកានេះ ធ្វើឡើងមុនពេលប្រកាសបើកសមាជថ្នាក់ជាតិរបស់គណបក្សកុម្មុយនីស្តប្រជាជនចិនប្រចាំឆ្នាំ។
ការបង្កើនការចំណាយនេះខ្ពស់ជាងឆ្នាំមុនៗដូចជា ឆ្នាំ២០១៧កើនឡើង៧% ចំណែកកាលពីឆ្នាំ២០១៦ការចំណាយបង្កើន៧,៦%។
ការបង្កើនថវិកាចំណាយលើវិស័យយោធានេះ ខណៈអត្រាកំណើនសេដ្ឋកិច្ចរបស់ចិនក៏កើនឡើងបន្តបន្ទាប់ដែរគឺឆ្នាំ២០១៧កើនឡើង៦,៩% ហើយឆ្នាំ២០១៨នេះ នឹងកើនបាន៦,៥%។
ការបង្កើនការចំណាយលើវិស័យយោធានេះ ខណៈប្រទេសចិនក្រោមការដឹកនាំរបស់លោក ស៊ី ជីនពីង កំពុងតែមានមហិច្ឆតាពង្រឹងការគ្រប់គ្រងផ្ទៃក្នុងរួមទាំងចង់វាយយកដែនដីតៃវ៉ាន់ទៅគ្រប់គ្រងវិញ និង កំពុងតែមានជម្លោះក្នុងការដំណ្តើមដែនទឹក និង ដែនកោះជាមួយប្រទេសជិតខាង៕