មេដឹកនាំកូរ៉េខាងជើង លោក គីម ជុងអ៊ុន ថ្លែងប្រាប់គណៈប្រតិភូរបស់កូរ៉េខាងត្បូងថា លោក ចង់សរសេរប្រវត្តិសាស្ត្រថ្មីមួយនៃការរួបរួមកូរ៉េឡើងវិញ ក្រោយពេលប្រទេសនេះបែកជាពីរតាំងពីឆ្នាំ១៩៥៣មក។
លោក គីម ជុងអ៊ុន ថ្លែងបែបនេះ នៅពេលដែលគណៈប្រតិភូមួយក្រុមរបស់កូរ៉េខាងត្បូងទៅបំពេញទស្សនកិច្ចនៅកូរ៉េខាងជើង។ ការថ្លែងបែបនេះ ក៏ជាលើកទី១ដែរចាប់តាំងពីលោក គីម ជុងអ៊ុន ឡើងកាន់តំណែងកាលពីឆ្នាំ២០១១មក។
មេដឹកនាំកូរ៉េខាងជើងរូបនេះ បានថ្លែងប្រាប់គណៈប្រតិភូកូរ៉េខាងត្បូងថា លោក ពិតជាចង់មានទំនាក់ទំនងឲ្យបានកាន់តែស្និទ្ធជាមួយកូរ៉េខាងត្បូង។ កាលពីថ្ងៃចន្ទម្សិលមិញ លោក គីម ជុងអ៊ុន ក៏បានរៀបចំ និងចូលរួមអាហារពេលល្ងាចជាមួយគណៈប្រតិភូរបស់កូរ៉េខាងត្បូង។ នេះបើតាមទីភ្នាក់ងារព័ត៌មានកូរ៉េខាងជើង KCNA។
គណៈប្រតិភូរបស់កូរ៉េខាងត្បូងមាន១០រូប ដែលសុទ្ធសឹងជាមន្ត្រីជាន់ខ្ពស់មានមុខងារសំខាន់ៗក្នុងនោះរួមមានទាំង មន្ត្រីមានតំណែងស្មើរដ្ឋមន្ត្រីគឺ ប្រធានចារកម្មលោក Suh Hoon និង លោក Chung Eui-yong ជាទីប្រឹក្សាសន្តិសុខជាតិ។
លោក Chung ថ្លែងប្រាប់អ្នកសារព័ត៌មានថា ដំណើរទស្សនកិច្ចនេះ នឹងបើកផ្លូវឲ្យលោក Moon Jae-in ប្រធានាធិបតីខាងត្បូង អាចជួបជាមួយមេដឹកនាំកូរ៉េខាងជើង ដើម្បីស្វែងរកដំណោះស្រាយជាថ្មី ក្នុងបញ្ចប់ជម្លោះនៅក្នុងឧបទ្វីបកូរ៉េ ហើយឈានដល់ការលុបបំបាត់កម្មវិធីអាវុធនុយក្លេអ៊ែនៅក្នុងឧបទ្វីបនេះ។
ចាប់តាំងពីលោក Moon Jae-in ឡើងកាន់តំណែងមក លោក តែងតែបង្ហាញជំហរចង់ ផ្សះផ្សាជាមួយកូរ៉េខាងជើង។
តាមការចុះផ្សាយរបស់ KCNA គឺមេដឹកនាំកូរ៉េខាងជើង លោក គីម ជុងអ៊ុន បានបើកចិត្តក្នុងការជជែកគ្រប់បញ្ហា និង បានស្វាគមន៍យ៉ាងកក់ក្តៅដល់ភាគីកូរ៉េខាងត្បូង។
ដំណើរការវិវត្តន៍ល្អនៃការទំនាក់ទំនងរវាងកូរ៉េខាងជើង គឺចាប់ផ្តើមតាំងពីដើមឆ្នាំ២០១៨នេះ ក្រោយពេលដែលលោក គីម ជុងអ៊ុន ថ្លែងបញ្ជាក់ជំហរក្នុងការបញ្ជូនក្រុមកីឡា និង គណៈប្រតិភូ របស់កូរ៉េខាងជើង ចូលរួមការប្រកួតកីឡាអូឡាំពិករដូវត្រជាក់នៅកូរ៉េខាងត្បូង។
ការដូរជំហររបស់មេដឹកនាំកូរ៉េខាងជើងបង្ហាញការចង់ស្និទ្ធស្នាលជាមួយកូរ៉េខាងត្បូងដែលធ្វើឲ្យសហគមន៍អន្តរជាតិមានការចាប់អារម្មណ៍នេះ គឺធ្វើឡើងបន្ទាប់ពីរ កាលពីចុងឆ្នាំ២០១៧ អង្គការសហប្រជាតិ និង សម្ព័ន្ធមិត្តរបស់អាមេរិកបានប្រកាសដាក់ទណ្ឌកម្មកាន់តែខ្លាំងលើប្រទេសនេះ ដោយសារតែសាកល្បងកម្មវិធីអាវុធនុយក្លេអ៊ែម្តងហើយម្តងទៀត។
ករណីនេះ ធ្វើឲ្យអន្តរជាតិនៅតែមានភាពមិនច្បាស់លាស់ថា តើឥរិយាបថរបស់មេដឹកនាំកូរ៉េខាងជើងនៅពេលនេះ ធ្វើឡើងដោយស្មោះត្រង់ ឬ ដើម្បីបន្ធូរស្ថានការណ៍មួយពេលតែប៉ុណ្ណោះនោះ ព្រោះថា កាលពីចុងឆ្នាំ២០១៧ លោក គីម ជុងអ៊ុន តែងតែគំរាមញឹកញាប់ក្នុងវាយប្រហារកូរ៉េខាងត្បូង៕
