ចិនកំពុងតែតាមដានយ៉ាងស្ងៀមស្ងាត់ពីសកម្មភាពនាវាចម្បាំងខ្នាតធំរបស់សហរដ្ឋអាមេរិក ចូលចតកំពង់ផែរបស់វៀតណាម ខណៈប្រទេសវៀតណាមកំពុងមានជម្លោះដែនសមុទ្រជាមួយប្រទេសចិន។
តាមការចុះផ្សាយរបស់APបានឲ្យដឹងថា នេះជាគឺលើកដំបូងហើយដែលសហរដ្ឋអាមេរិកបញ្ជូននាវាចម្បាំងរបស់ខ្លួនចូលចតនៅវៀតណាមបន្ទាប់ពីប្រទេសទាំងពីរបានបញ្ចប់សង្គ្រាមកាលពីឆ្នាំ១៩៧៥។
កាលពីថ្ងៃចន្ទដើមសប្តាហ៍នេះ នាវាចម្បាំងរបស់អាមេរិក USS Carl Vinson ដែលមានផ្ទុកនាវិកជាង៥០០០ នាក់បានចូលចតនៅកំពុងផែភាគកណ្តាលនៃទីក្រុងដាណាងប្រទេសវៀតណាម។
AP ចុះផ្សាយថា សកម្មភាពទាំងនេះ កំពុងតែមានការតាមដានយ៉ាងយកចិត្តទុកដាក់និងស្ងៀមស្ងាត់ពីសំណាក់ប្រទេសចិន។ បច្ចុប្បន្នប្រទេសចិនកំពុងតែកសាងមូលដ្ឋានទ័ពនៅកោះស្ព្រាតលី និង កោះប៉ារ៉ាសែល ជាកន្លែងដែលកំពុងមានជម្លោះ ហើយការកសាងមូលដ្ឋានទ័ពនេះក៏ទទួលរងការរិះគន់ពីសហរដ្ឋអាមេរិកដែរ។
ប្រទេសវៀតណាមនិង សហរដ្ឋអាមេរិកធ្លាប់ផ្ទុះសង្គ្រាមកាលពីឆ្នាំ១៩៥៥ដល់ឆ្នាំ១៩៧៥ បណ្តាលពលរដ្ឋនិង ទាហានវៀតណាមប្រមាណ៣លាននាក់បានស្លាប់ ចំណែកយោធារបស់អាមេរិកជិត៦ម៉ឺនាក់ក៏បានស្លាប់នៅក្នុងព្រឹត្តិការណ៍បង្ហូរឈាមនេះដែរ។
អាមេរិក និង វៀតណាមចាប់ផ្តើមទំនាក់ទំនងការទូតឡើងវិញឆ្នាំ១៩៩៥ ហើយអាមេរិកបានសម្រេចដកបំរាមលក់អាវុធឲ្យវៀតណាតកាលពីឆ្នាំ២០១៦។ សកម្មភាពទាំងហាក់បង្ហាញថា អាមេរិកនិងវៀតណាមកំពុង តែព្យាយាមបំភ្លេចគំនុំចាស់ ដើម្បីសហការគ្នាទប់ទល់ជាមួយចិន៕