រដ្ឋាភិបាលស្រីលង្កាកំពុងតែបន្ថែមកម្លាំងទ័ព និងវិធានការផ្សេងៗទៀត ដើម្បីដោះស្រាយទប់ស្កាត់ហិង្សារវាងក្រុមអ្នកកាន់សាសនាព្រះពុទ្ធ និង សាសនាឥស្លាមនៅក្នុងទីក្រុងខានឌី នៅចំកណ្តាលនៃប្រទេស។
នគរបាលបានប្រើប្រាស់ឧស្ម័នបង្ហូរទឹកភ្នែក បាញ់ទៅលើក្រុមកុប្បករកាន់សាសនាព្រះពុទ្ធ ដែលនាំគ្នាវាយបំផ្លាញព្រះវិហារឥស្លាម និងកន្លែងមុខជំនួញផ្សេងៗទៀតរបស់អ្នកកាន់សាសនាឥស្លាម។ នេះបើតាមសារព័ត៌មាន BBC។
រដ្ឋាភិបាលបានប្រកាសដាក់ប្រទេសក្នុងស្ថានភាពអាសន្ន ហើយធ្វើបំរាមគោចរគឺកំណត់ពេលនៃការធ្វើដំណើរ និង បានបិទបណ្តាញទំនាក់ទំនងសង្គមនានា ដើម្បីទប់ស្កាត់ហិង្សាកំឲ្យរាលដាលបន្តទៀត។
ពេលនេះ រដ្ឋាភិបាលកំពុងតែមានការព្រួយបារម្ភថា អាចនឹងមានការសងសឹកទៀត ក្រោយពេលដែលគេរកឃើញថា យុវជនម្នាក់កាន់សាសនាឥស្លាមត្រូវបានដុតសម្លាប់នៅក្នុងព្រះវិហារមួយកន្លែងដោយអ្នកកាន់សាសនាព្រះពុទ្ធ។
រដ្ឋាភិបាលក៏បានបន្ថែមកម្លាំងទ័ពរាប់ពាន់នាក់បន្ថែមទៀត ទៅលើគោលដៅសំខាន់នៅក្នុងទីក្រុងដើម្បីគ្រប់គ្រងស្ថានការណ៍។ ប៉ុន្តែហិង្សានៅតែមានភាពមិនច្បាស់លាស់នៅឡើយ៕
