មេដឹកនាំសហរដ្ឋអាមេរិក លោក ដូណាល ត្រាំ និង មេដឹកនាំកូរ៉េខាងជើង លោក គីម ជុងអ៊ុន មានគម្រោងជួបគ្នានៅក្នុងខែឧសភាខាងមុខនេះ ដើម្បីពិភាក្សាស្វែងរកដំណោះស្រាយបញ្ហាកំពុងប្រឈមនៅឧបទ្វីបកូរ៉េ។
សេចក្តីប្រកាសដែលធ្វើឲ្យមានការភ្ញាក់ផ្អើលពីមហាជននោះគឺមន្ត្រីជាន់ខ្ពស់របស់កូរ៉េខាងត្បូងបានលើកឡើងនៅទីក្រុងវ៉ាស៊ីនតោននៅថ្ងៃនេះថា មេដឹកនាំកូរ៉េខាងជើង សុំជួបជាមួយមេដឹកនាំអាមេរិក មេដឹកនាំកូរ៉េខាងជើងក៏បានប្តេជ្ញាក្នុងការផ្អាកសាកល្បងអាវុធ និង ឈានដល់ការបំផ្លាញកម្មវិធីអាវុធនុយក្លេអ៊ែ។ នេះបើតាមសារព័ត៌មាន BBC។
គណៈប្រតិភូរបស់កូរ៉េខាងត្បូងបានជួបជាមួយមេដឹកនាំកូរ៉េខាងជើងនៅដើមសប្តាហ៍នេះ រយៈពេលពីរថ្ងៃហើយបញ្ជាក់ថា ទទួលបានលទ្ធផលល្អ ទើបនាំសារពីមេដឹកនាំកូរ៉េខាងជើងទៅសហរដ្ឋអាមេរិក ដើម្បីជួបជាមួយលោក ដូណាល ត្រាំ។
ទន្ទឹមនឹងការបង្ហាញជំហរចង់ជួបជាមួយមេដឹកនាំអាមេរិកនេះ មេដឹកនាំកូរ៉េខាងជើងក៏បានបញ្ជាក់ជំហរថា នឹងជួបជាមួយមេដឹកនាំកូរ៉េខាងត្បូងនៅក្នុងខែមេសាខាងមុខនេះ។
លោក ដូណាល ត្រាំ ដែលពីមុនធ្លាប់ថ្លែងថា មិនមានអ្វីនិយាយជាមួយកូរ៉េខាងជើងនោះថ្លែងថា ពេលនេះស្ថានភាពបានប្រសើរឡើង ហើយលោកគ្រោងជួបជាមួយលោក គីម ជុងអ៊ុន នៅក្នុងខែឧសភាខាងមុខ។
ទោះយ៉ាងណាលោក ត្រាំ ថ្លែងថា ដំណើរការចរចាបានរីកចម្រើន ប៉ុន្តែកម្មវិធីអាវុធនុយក្លេអ៊ែរបស់កូរ៉េខាងជើងនៅតែបន្តមិនទាន់ផ្អាក លោកថា ដូច្នេះទណ្ឌកម្មនៅតែបន្តអនុវត្តន៍ រហូតដល់មានការកិច្ចព្រមព្រៀងជាផ្លូវការកើតឡើង។
ទីប្រឹក្សាសន្តិសុខជាតិរបស់កូរ៉េខាងត្បូងលោក Chung ថ្លែងថា លោកបានប្រាប់លោក ត្រាំ អំពីគោលបំណងរបស់លោក គីម ជុងអ៊ុន ដែលប្តេជ្ញារំលាយចោលកម្មវិធីអាវុធនុយក្លេអ៊ែ។
ទាំងគម្រោងជំនួបមេដឹកនាំកូរ៉េខាងត្បូងជាមួយកូរ៉េខាងជើង និង ជំនួបមេដឹកនាំកូរ៉េខាងជើងជាមួយអាមេរិកគឺពួកគេមិនទាន់ផ្តល់ព័ត៌មានលម្អិតលើខ្លឹមសារ និង ទីតាំងដែលត្រូវជួបគ្នានោះទេ។