នាយករដ្ឋមន្ត្រីអង់គ្លេស អ្នកស្រី ថេរ៉េសា ម៉េយ៍ បានសម្រេចបណ្ដេញអ្នកការទូត ២៣រូបចេញពីប្រទេសខ្លួន ព្រមទាំងសម្រេចផ្អាកទំនាក់ទំនងកម្រិតខ្ពស់ជាមួយរុស្ស៊ី ក្នុងនោះមានទាំងព្រឹត្តិការណ៍ប្រកួតកីឡាបាល់ទាត់ពិភពលោក World Cup ផងដែរ ដោយអ្នកស្រីថា រដ្ឋាភិបាលអង់គ្លេសរកឃើញថា ក្រុងមូស្គូទទួលខុសត្រូវលើការដាក់ថ្នាំបំពុលលើអតីតចារកម្មម្នាក់។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
បើតាមការចុះផ្សាយរបស់ AFP ដដែលនេះ អ្នកស្រី ម៉េយ៍ បានប្រាប់ទៅសភាអង់គ្លេសថា រុស្ស៊ីមិនបានឆ្លើយតបទៅនឹងការទាមទាររបស់អ្នកស្រីឲ្យពន្យល់ពីរបៀបដែលថ្នាំគីមីពុល Novichok ផលិតឡើងនៅជំនាន់សូវៀត ត្រូវបានប្រើប្រាស់នៅទីក្រុង Salisbury របស់អង់គ្លេសកាលពីថ្ងៃទី៤ ខែមីនានេះ។
AFP បានចុះផ្សាយបន្ថែមថា នៅឯកិច្ចប្រជុំបន្ទាន់មួយនៅក្រុមប្រឹក្សាសន្តិសុខអង្គការសហប្រជាជាតិនៅទីក្រុងញូវយ៉ក អាមេរិកបានបង្ហាញជំហររឹងមាំរបស់ខ្លួននៅខាងអង់គ្លេស ដោយបានទាត់ចោលនូវការអះអាងរបស់ក្រុងមូស្គូថា មិនបានជាប់ពាក់ព័ន្ធនៅក្នុងការវាយប្រហារលើលោក Sergei Skripal និងកូនស្រីរបស់លោកនោះ។
អគ្គរដ្ឋទូតអាមេរិកប្រចាំអង្គការសហប្រជាជាតិ អ្នកស្រី Nikki Haley បានប្រាប់អង្គប្រជុំនោះថា សហរដ្ឋអាមេរិកជឿថា រុស្ស៊ីទទួលខុសត្រូវលើការវាយប្រហារទៅលើមនុស្សទាំង ២នាក់នោះ នៅលើទឹកដីអង់គ្លេស ដោយបានប្រើប្រាស់ថ្នាំគីមីពុល។
សម្ព័ន្ធមិត្តយោធាណាតូ ក៏បានបង្ហាញការគាំទ្ររបស់ពួកគេចំពោះអង់គ្លេសផងដែរ ក្រោយពីថ្នាំគីមីពុលត្រូវបានគេប្រើប្រាស់ជាលើកដំបូងនៅអឺរ៉ុប បន្ទាប់ពីការបញ្ចប់ទៅនៃសង្គ្រាមលោកលើកទី២៕