ប្រធានាធិបតីអាមេរិក លោក ដូណាល់ ត្រាំ នឹងបង្ហាញផែនការរបស់លោកនៅថ្ងៃស្អែកនេះ ដើម្បីប្រយុទ្ធប្រឆាំងនឹងការរីករាលដាលនៃគ្រឿងញៀន ក្នុងនោះមានទាំងការព្យាយាមបង្កើតច្បាប់ប្រហារជីវិតជនជួញដូរគ្រឿងញៀនផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ខណៈដែលគូសបញ្ជាក់ពីចំណុចសំខាន់ៗនៃផែនការនេះ មន្ត្រីសេតវិមានម្នាក់ បានបញ្ជាក់ថា ក្រសួងយុត្តិធម៌ នឹងព្យាយាមបង្កើតច្បាប់ប្រហារជីវិតប្រឆាំងនឹងឈ្មួញជួញដូរគ្រឿងញៀន ដែលនឹងសាមសមទៅនឹងច្បាប់បច្ចុប្បន្ន។
មន្ត្រីសេតវិមានរូបនេះ ពុំបានផ្ដល់ព័ត៌មានលម្អិតអំពីរបៀបដែលទោសប្រហារជីវិតអាចនឹងត្រូវបានបង្កើតឡើងសម្រាប់ដាក់ទោសឈ្មួញជួញដូរគ្រឿងញៀន ដោយគ្មានការកែប្រែរដ្ឋធម្មនុញ្ញនោះឡើយ។
លោក ត្រាំ គ្រោងនឹងលាតត្រដាងផែនការរបស់លោកនៅក្នុងសុន្ទរកថាមួយនៅទីក្រុង Manchester ស្ថិតក្នុងរដ្ឋ New Hampshure ជារដ្ឋដែលរងគ្រោះដោយសារតែបញ្ហាគ្រឿងញៀន។
ពលរដ្ឋអាមេរិកប្រហែល ២លាន ៤សែននាក់ ត្រូវបានគេប៉ាន់ប្រមាណថា បានញៀនទៅនឹងគ្រឿងញៀន ដែលត្រូវបានគេចាត់ទុកជាថ្នាំបំបាត់ការឈឺចាប់ និងថ្នាំអេរ៉ូអ៊ីន៕