មេដឹកនាំចិនបានព្រមានទៅកោះតៃវ៉ាន់នៅថ្ងៃនេះថា ដែនដីកោះមួយនេះនឹងរងទណ្ឌកម្មប្រវត្តិសាស្ត្រ សម្រាប់ការប៉ុនប៉ងបំបែកខ្លួន។ នេះបើតាមការចុះផ្សាយរបស់សារព័ត៌មានសិង្ហបុរី Channel News Asia។
តៃវ៉ាន់គឺជាបញ្ហាមួយដ៏រស៊ើបនៅក្នុងបញ្ហានានារបស់ចិន និងជាចំណុចគ្រោះថ្នាក់ផ្នែកយោធាផងដែរ។
ការប្រឈមមុខដាក់គ្នារវាងចិនដីគោក និងដែនដីកោះតៃវ៉ាន់ បានកើនឡើងចាប់តាំងពីការបោះឆ្នោតឆ្នាំ២០១៦ ដែលនៅពេលនោះ អ្នកស្រី សៃ អ៊ីងវ៉េន មកពីគណបក្សប្រជាធិបតេយ្យរីកចម្រើនគាំទ្រឯករាជ្យភាពនោះ បានឈ្នះការបោះឆ្នោត និងឡើងកាន់តំណែងប្រធានាធិបតីដែនដីកោះមួយនេះ។
ចិនសង្ស័យថា អ្នកស្រី សៃ ចង់ជំរុញការប្រកាសឯករាជ្យជាផ្លូវការ ដែលជាការល្មើសទៅនឹងបន្ទាត់ក្រហមសម្រាប់មេដឹកនាំកុម្មុយនីស្តចិននៅទីក្រុងប៉េកាំង ប៉ុន្តែ អ្នកស្រី សៃ ផ្ទាល់បាននិយាយថា អ្នកស្រីចង់រក្សាឋានៈដែនដីកោះនេះដដែល និងប្ដេជ្ញាឆ្ពោះទៅធានាបាននូវសន្តិភាព។
ប្រទេសចិនក៏ខឹងសម្បារនឹងមេដឹកនាំអាមេរិក លោក ដូណាល់ ត្រាំ ដែលបានចុះហត្ថលេខាលើច្បាប់មួយកាលពីសប្ដាហ៍មុន ដែលបានជំរុញអាមេរិក ឲ្យបញ្ជូនមន្ត្រីជាន់ខ្ពស់ទៅកាន់កោះតៃវ៉ាន់ ដើម្បីជួបជាមួយសមភាគីរបស់ពួកគេ។
នៅក្នុងសុន្ទរកថាមួយនៅថ្ងៃបិទបញ្ចប់កិច្ចប្រជុំសភាប្រចាំឆ្នាំរបស់ចិននោះ ប្រធានាធិបតីចិន លោក ស៊ីន ជិនពីង បានប្រាប់ទៅប្រតិភូ ៣ពាន់នាក់ថា ចិននឹងជំរុញឲ្យមានការបង្រួបបង្រួមមាតុភូមិតាមបែបសន្តិវិធី និងធ្វើការដើម្បីឲ្យពលរដ្ឋដែនដីកោះតៃវ៉ាន់កាន់តែច្រើន រីករាយទៅនឹងឱកាសអភិវឌ្ឍន៍របស់ចិន៕