ប្រធានាធិបតីអាមេរិក លោក ដូណាល់ ត្រាំ នៅពេលនេះ កំពុងធ្លាក់ចូលក្នុងរឿងអាស្រូវផ្លូវភេទ បន្ទាប់ពីតារាសម្ដែងរឿងអាសអាភាស អ្នកនាង Stormy Daniels បានចេញមកលាតត្រដាងថា មេដឹកនាំអាមេរិករូបនេះធ្លាប់ដេករួមរ័ក្សជាមួយនាង។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
AFP បានចុះផ្សាយបន្តថា តារាសម្ដែងរឿងអាសអាភាសរូបនេះ បានឲ្យដឹងទៀតថា នាងកំពុងរងការគំរាមកំហែង ឲ្យរក្សាភាពស្ងប់ស្ងាត់ បន្ទាប់ពីនាងបានឡើងបកស្រាយនៅក្នុងកិច្ចសម្ភាសជាមួយទូរទស្សន៍មួយនៅថ្ងៃនេះ។
ក្នុងកម្មវិធី ៦០នាទីរបស់ទូរទស្សន៍ CBS អ្នកនាង Daniels បានប្រាប់ថា នាងបានរួមរ័ក្សជាមួយលោក ត្រាំ ម្ដងនៅក្នុងឆ្នាំ២០០៦ ដោយគ្មានស្រោមអនាម័យការពារនោះទេ ហើយនាងបានរងការគំរាមកំហែងពីបុរសម្នាក់ នៅចំណតរថយន្តមួយកន្លែងនៅទីក្រុងឡាស បន្ទាប់ពីនាងបានយល់ព្រមនិយាយរឿងរ៉ាវរបស់នាងកាលពីឆ្នាំ២០១១។
តារាសម្ដែងរូបនេះកំពុងតែព្យាយាមឲ្យគេបញ្ចប់កិច្ចសន្យាមិនទម្លាយការពិតមួយ ដែលនាងបានចុះមួយរយៈពេលមុនការបោះឆ្នោតប្រធានាធិបតីឆ្នាំ២០១៦ ដែលបាននាំលោក ត្រាំ ឡើងកាន់អំណាច ដែលនៅពេលនោះ នាងទទួលបានទឹកប្រាក់ ១៣ម៉ឺនដុល្លារអាមេរិក។
អ្នកនាង Daniels បានប្រាប់ពិធីករថា នាងបានរួមរ័ក្សជាមួយលោក ត្រាំ ហើយប្រាប់ថា នាងបានរក្សាទំនាក់ទំនងជាមួយលោក ត្រាំ បន្ទាប់ពីអ្នកទាំងពីរបានរួមរ័ក្សជាមួយគ្នាមក៕
