ទីភ្នាក់ងារព័ត៌មាន AFP បានរាយការណ៍ថា ក្រុមផ្ដាច់ខ្លួនជនជាតិកាតាឡូណារាប់ពាន់នាក់ បានប្រឈមមុខនឹងប៉ូលិសនៅតំបន់កាតាឡូណាកាលពីថ្ងៃម្សិលមិញនេះ បន្ទាប់ពីការចាប់ខ្លួន លោក Carles Puidgemont អតីតមេដឹកនាំតំបន់នេះ នៅឯប្រទេសអាល្លឺម៉ង់ បន្ទាប់ពីលោកបានគេចខ្លួនពីប្រទេសអេស្ប៉ាញអស់រយៈពេល ៥ខែ។
AFP បានចុះផ្សាយបន្តថា ប៉ូលិសតំបន់កាតាឡូណា បានស្ថិតក្នុងស្ថានភាពបង្ក្រាបបាតុកម្ម និងបានប្រើដំបងឆក់វាយទៅលើក្រុមបាតុករ ដើម្បីទប់ស្កាត់ក្រុមមហាជនកុំឲ្យរុលទៅកាន់ការិយាល័យតំណាងរដ្ឋាភិបាលអេស្ប៉ាញនៅទីក្រុងបាសេឡូណា ដែលជាទីក្រុងដ៏ស្តុកស្ដមស្ថិតនៅភាគឦសានប្រទេសអេស្ប៉ាញ។
ក្រុមមន្ត្រីប៉ូលិសបានបាញ់ព្រមាន ដើម្បីព្យាយាមគ្រប់គ្រងក្រុមបាតុករ ដែលព្យាយាមរុញកុងតឺន័រទៅរកប៉ូលិស។ មនុស្សមួយចំនួនបានគប់ដប កំប៉ុង និងពងមាន់ដាក់ទៅលើប៉ូលិស។
ទីភ្នាក់ងារសង្គ្រោះបន្ទាន់ បាននិយាយថា មនុស្ស ៩៧នាក់ បានរងរបួសអំឡុងពេលប៉ះទង្គិចគ្នានានានៅទីក្រុងបាសេឡូណា ដោយភាគច្រើនរលាត់ស្បែក ក្នុងនោះមានទាំងមន្ត្រីប៉ូលិស ១៣នាក់ផងដែរ។
មនុស្ស ៧នាក់ទៀត ក៏រងរបួសផងដែរនៅក្នុងបាតុកម្មមួយនៅតំបន់ Lleida ស្ថិតនៅចម្ងាយ ១៥០គីឡូម៉ែត្រភាគខាងលិចទីក្រុងបាសេឡូណា ហើយមនុស្សម្នាក់ទៀត បានរងរបួសនៅឯតំបន់ Tarragona ស្ថិតនៅភាគខាងត្បូងទីក្រុងនេះ។
ប្រធានសភាតំបន់កាតាឡូណា លោក Roger Torrent បានអំពាវនាវតាមសុន្ទរកថាចាក់ផ្សាយតាមទូរទស្សន៍ក្នុងតំបន់ ឲ្យរក្សាភាពស្ងប់ស្ងាត់។
អ្នកនាំពាក្យប៉ូលិសអាល្លឺម៉់ង់ បានប្រកាសអំពីការចាប់ខ្លួនលោក Puigdemont ខណៈដែលលោកឆ្លងដែនទៅប្រទេសដាណឺម៉ាកតាមរថយន្តមួយគ្រឿង ដែលជាការឆ្លើយតបទៅនឹងដីកាចាប់ខ្លួនចេញដោយប្រទេសអេស្ប៉ាញ។
ការចាប់ខ្លួនលោក Puigdemont បានកើតឡើង ៥ខែក្រោយពីលោកគេចខ្លួន ខណៈដែលព្រះរាជអាជ្ញាអេស្ប៉ាញបានព្យាយាមចោទប្រកាន់គាត់ នៅក្នុងសំណុំរឿងរៀបចំការបោះឆ្នោតប្រជាមតិដើម្បីប្រកាសឯករាជ្យតំបន់កាតាឡូណា៕