លោកនាយករដ្ឋមន្ត្រី ហ៊ុន សែន បានលើកឡើងនៅព្រឹកថ្ងៃនេះថា លោកមិនជឿថា តុលាការនឹងដោះលែងលោក កឹម សុខា នោះឡើយ ខណៈដែលសាលាឧទ្ធរណ៍កំពុងបើកសវនាការលើសំណុំរឿងមេបក្សប្រឆាំងរូបនេះ។
នៅក្នុងពិធីចែកសញ្ញាបត្រដល់និស្សិតសាកលវិទ្យាល័យឯកជនមួយនៅក្នុងរាជធានីភ្នំពេញនៅព្រឹកថ្ងៃនេះ លោក ហ៊ុន សែន បានថ្លែងថា៖ «ខ្ញុំមិនជឿទេថា សាលាឧទ្ធរណ៍នឹងដោះលែងអាមេក្បត់ជាតិហ្នឹងទេ»។
លោក ហ៊ុន សែន ក៏បានបញ្ជាក់ផងដែរថា តុលាការមានសិទ្ធិសម្រេចដោយឯករាជ្យក៏ដោយ ប៉ុន្តែ លោកថា លោកបានបញ្ជាឲ្យចាប់ខ្លួនលោក កឹម សុខា។
លោក ហ៊ុន សែន បានបង្ហាញជំនឿចិត្តរបស់លោកបែបនេះ ខណៈដែលសាលាឧទ្ធរណ៍បើកសវនាការជុំវិញបណ្ដឹងជំទាស់ការបន្តឃុំខ្លួនលោក កឹម សុខា នៅព្រឹកថ្ងៃនេះ។
លោក កឹម សុខា ត្រូវបានតុលាការសម្រេចឲ្យបន្តឃុំខ្លួនបន្ថែមទៀត បន្ទាប់ពីលោកត្រូវបានឃុំខ្លួនបណ្ដោះអាសន្នអស់រយៈពេលជាង ៦ខែមកហើយ។
មេដឹកនាំអតីតគណបក្សសង្គ្រោះជាតិរូបនេះ ត្រូវបានសមត្ថកិច្ចចាប់ខ្លួនកាលពីដើមខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ» និង «ឃុបឃិត»ជាមួយបរទេស ក្នុងបំណងផ្ដួលរំលំរដ្ឋាភិបាលកម្ពុជាស្របច្បាប់។
ទោះជាយ៉ាងណា សហគមន៍អន្តរជាតិ នាំមុខដោយសហភាពអឺរ៉ុប និងសហរដ្ឋអាមេរិក បានថ្កោលទោសចំពោះការចាប់ខ្លួនមេដឹកនាំបក្សប្រឆាំងរូបនេះ ព្រមទាំងវិធានការដទៃទៀតទៅលើគណបក្សសង្គ្រោះជាតិ៕