លោកនាយករដ្ឋមន្ត្រី ហ៊ុន សែន បានព្រមានដកតំណែងមេពន្ធនាគារកម្ពុជានៅព្រឹកថ្ងៃនេះ ដោយលោកថា មន្ត្រីអនុរក្សពន្ធនាគារបានអនុញ្ញាតឲ្យមន្ត្រីបក្សប្រឆាំង លោក មាជ សុវណ្ណារ៉ា ដែលកំពុងជាប់ឃុំនៅពន្ធនាគារនោះ ប្រើប្រាស់ទូរស័ព្ទសម្រាប់ទំនាក់ទំនងចេញពីទីឃុំឃាំង។
លោកនាយករដ្ឋមន្ត្រីបានព្រមានបែបនេះ អំឡុងពេលលោកថ្លែងសុន្ទរកថាក្នុងពិធីចែកសញ្ញាបត្រដល់និស្សិតនៃសាកលវិទ្យាល័យមួយនៅរាជធានីភ្នំពេញ។
លោក ហ៊ុន សែន ថ្លែងថា៖ «បើអាមេគុកហ្នឹងគ្រប់គ្រងមិនបានទេ ដូរអាមេគុកហ្នឹងចោលទៅ»។
ក្រៅពីថ្លែងព្រមានមេពន្ធនាគារកម្ពុជាហើយនោះ លោក ហ៊ុន សែន ក៏បានថ្លែងបញ្ជាក់ជាថ្មីទៀតថា លោកនឹងមិនលើកលែងទោសដល់ក្រុមមន្ត្រីអតីតគណបក្សសង្គ្រោះជាតិដែលកំពុងជាប់ឃុំនោះទេ ក្នុងនោះមានទាំងលោក មាជ សុវណ្ណរ៉ា ផងដែរ។
