របាយការណ៍សម្ងាត់ជប៉ុន​ថា លោក គីម ជុងអ៊ុនដឹកនាំមន្ត្រីធ្វើដំណើរទៅចិន

របាយការណ៍ដែលចុះផ្សាយដោយទីភ្នាក់ងារសារព័ត៌មាន​ជប៉ុន​ Kyodo បានលើកឡើងថា រថភ្លើងមួយគ្រឿងមាន​លោក គីម ជុងអ៊ុន​ និងមន្ត្រីជាន់ខ្ពស់ផ្សេងទៀតនៅក្នុងនោះ​បានធ្វើដំណើរទៅកាន់ទីក្រុងប៉េកាំងប្រទេសចិនកាលពីថ្ងៃចន្ទម្សិលមិញ​។​

Kyodo មិនបញ្ជាក់ប្រភពច្បាស់លាស់ទេគ្រាន់តែបញ្ជាក់ថា តាមមន្ត្រីរបស់កូរ៉េខាងជើងដំណើរទស្សនកិច្ចនេះគឺជាការរឹតចំណងមិត្តភាពឲ្យកាន់តែប្រសើររវាងចិន និងកូរ៉េខាងជើង។​

ចាប់តាំងពីលោក គីម ជុងអ៊ុនឡើងកាន់តំណែងតពីឪពុកកាលពីឆ្នាំ២០១១មក លោកមិនដែលធ្វើដំណើរទៅក្រៅប្រទេសនោះទេ។

ចិនគឺជាប្រទេសសម្ព័ន្ធមិត្តតែមួយគត់របស់កូរ៉េខាងជើងទាំងដៃគូនយោបាយនិងពាណិជ្ជកម្ម​ ខណៈកូរ៉េខាងជើង​កំពុងហ៊ុំព័ទ្ធដោយទណ្ឌកម្មពីសហគមន៍អន្តរជាតិ​ដោយសារតែកម្មវិធីអាវុធនុយក្លេអ៊ែ។​

ដំណើរទស្សនកិច្ចរបស់លោក គីម ជុងអ៊ុនទៅកាន់ប្រទេសចិន​នៅពេលនេះ ធ្វើឡើងក្រោយពេលដែល មេដឹកនាំកូរ៉េខាងជើងរូបនេះគ្រោងជួបជាមួយមេដឹកនាំកូរ៉េខាងត្បូង និង មេដឹកនាំសហរដ្ឋអាមេរិកលោកដូណល ត្រាំនៅខែឧសភាខាងមុខ។​