អាជ្ញាធរថៃបានប្រកាសបិទតំបន់ទេសចរណ៍ឆកសមុទ្រម៉ាយ៉ា ដែលត្រូវបានរំលេចឡើងយ៉ាងល្បីល្បាញនៅក្នុងខ្សែភាពយន្ត «ឆ្នេរសមុទ្រ» ជាខ្សែភាពយន្តសម្ដែងដោយតារាហូលីវូដល្បីល្បាញ លោក Leonardo DiCaprio។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់សេចក្ដីប្រកាសមួយរបស់នាយកដ្ឋានឧទ្យានជាតិ និងសត្វព្រៃរបស់ថៃ។
បើតាម Reuters អាជ្ញាធរថៃ បានសម្រេចបិទមិនឲ្យភ្ញៀវទេសចរចូលទៅលេងកម្សាន្តនៅឆកសមុទ្ររយៈពេល ៤ខែ ចាប់ពីខែមិថុនាទៅ។
អ្នកជំនាញផ្នែកធនធានសមុទ្រនៅទីក្រុងបាងកក លោក ថន ធម្មរ៉ុងណាវ៉ាសាវ៉ាត ត្រូវបានដកស្រង់សម្ដីដែលនិយាយថា ប្រព័ន្ធអេកូឡូស៊ីនៅកោះនានានៅឆកសមុទ្រនោះ កំពុងតែរងគ្រោះថ្នាក់ មិនអាចបំពេញតម្រូវការមនុស្សច្រើន ការបំពុលបរិស្ថានដោយសារតែទូកកម្សាន្ត និងសណ្ឋាគារនៅតាមមាត់ឆ្នេរនោះឡើយ។
លោក ថន បាននិយាយថា កោះប៉ប្រះទឹកជាង ៣ភាគ៤របស់ថៃ បានរងការខូចខាត ដោយសារតែការកើនឡើងកម្ដៅសមុទ្រ និងទេសចរណ៍ដែលមិនត្រូវបានត្រួតពិនិត្យ ហើយលោកក៏បានផ្ដល់អនុសាសន៍ឲ្យកម្រិតចំនួនភ្ញៀវទេសចរត្រឹមចំនួន ៦លាននាក់ក្នុងមួយឆ្នាំ សម្រាប់ចូលលេងកម្សាន្តនៅតាមឧទ្យានសមុទ្រ ២២កន្លែង ដើម្បីទុកឲ្យប្រព័ន្ធអេកូឡូស៊ីអាចស្ដារឡើងវិញ។
ថៃបានបិទតំបន់លំហែកម្សាន្តជាច្រើនកន្លែងមកហើយកាលពីឆ្នាំ២០១១ បន្ទាប់ពីការប្រែប្រួលនៃសីតុណ្ហភាពទឹកសមុទ្រ បានបណ្ដាលឲ្យខូចខាតដល់ផ្កាថ្មនៅសមុទ្រអាន់ដាម៉ាន់ ដែលជាតំបន់កម្សាន្តលំដាប់ពិភពលោកមួយ ហើយប្រទេសនេះក៏បានបិទកោះមួយចំនួនផងដែរនៅឆ្នាំ២០១៦៕
