គិតចាប់តាំងពីនាងរងការបាញ់ប្រហារកាលពីឆ្នាំ២០១២មក ជយលាភីពានរង្វាន់ណូបែលសន្តិភាពពិភពលោក យុវតី ម៉ាឡាឡា យូសាហ្វហ្សៃ បានរស់នៅឆ្ងាយពីប្រទេសកំណើតអស់រយៈពេល ៦ឆ្នាំមកហើយ។
ប៉ុន្តែ នាងបាននិយាយនៅថ្ងៃនេះថា នាងបានធ្វើដំណើរទៅប្រទេសប៉ាគីស្ថាន ដែលជាប្រទេសកំណើតរបស់នាង នៅថ្ងៃព្រហស្បតិ៍នេះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីរបស់យុវតីរូបនេះ។
ម៉ាឡាឡា ត្រូវបានខ្មាន់កាំភ្លើងនៃក្រុមបះបោរតាលីបង់ បាញ់ប្រហារត្រូវចំក្បាលកាលពីឆ្នាំ២០១២ ដោយសារតែនាងបានតស៊ូមតិជំរុញការសិក្សាអប់រំសម្រាប់ក្មេងស្រីនាពេលនោះ។
ទោះជាយ៉ាងណា AFP បានចុះផ្សាយបន្ថែមថា ព័ត៌មានលម្អិតអំពីដំណើររបស់យុវតីរូបនេះ មិនត្រូវបានគេបង្ហាញឲ្យដឹងទេ ដោយសារតែទាក់ទងនឹងសុវត្ថិភាពរបស់នាងផ្ទាល់ ប៉ុន្តែ ដំណើរទស្សនកិច្ចរបស់ម៉ាឡាឡា ត្រូវបានគេរំពឹងថា នឹងមានរយៈពេល ៤ថ្ងៃ ក្នុងនោះនឹងមានជំនួបជាមួយនាយករដ្ឋមន្ត្រីប៉ាគីស្ថាន លោក ហ្សាហ៊ីដ ខាហ្កាន់ អាប់បាស៊ី ផងដែរ។
បើតាមរូបថតផ្សព្វផ្សាយតាមទូរទស្សន៍ក្នុងប្រទេសប៉ាគីស្ថាន បង្ហាញថា យុវតីជានិស្សិតអាយុ ២០ឆ្នាំរូបនេះ ត្រូវបានការពារសន្តិសុខយ៉ាងតឹងរឹងនៅឯព្រលានយន្តអន្តរជាតិ បេនសៀ ប៊ូតូ។
ម៉ាឡាឡា បានក្លាយជានិមិត្តរូបសកលលោកសម្រាប់សិទ្ធិមនុស្ស និងជាអ្នកធ្វើយុទ្ធនាការតស៊ូមតិសម្រាប់ការអប់រំរបស់ក្មេងស្រី ចាប់តាំងពីខ្មាន់កាំភ្លើងបានបាញ់ប្រហារទៅលើរថយន្តសាលារៀនរបស់នាងកាលពីខែតុលា ឆ្នាំ២០១២ ហើយបានទទួលពានរង្វាន់សន្តិភាពនៅឆ្នាំ២០១៤៕