សារព័ត៌មានបានចុះផ្សាយព្រោងព្រាតថា កូរ៉េខាងជើង និងខាងត្បូង នឹងរៀបចំជំនួបកំពូលលើកដំបូងរបស់ពួកគេនៅក្នុងរយៈពេលជា១ទសវត្សរ៍មកនេះ នៅថ្ងៃទី២៧ ខែមេសាខាង។
សារព័ត៌មានអន្តរជាតិបានចុះផ្សាយបែបនេះ ដោយបានដកស្រង់សម្ដីក្រុមមន្ត្រីកូរ៉េខាងត្បូង ដែលនិយាយនៅថ្ងៃនេះថា បន្ទាប់ពីពួកគេជួបជាមួយក្រុមមន្ត្រីជាន់ខ្ពស់កូរ៉េខាងជើង នៅកន្លែងគ្មានយោធា។
ប្រទេសជាបងប្អូននឹងគ្នាទាំងពីរនេះ បានសម្រេចកំណត់យកថ្ងៃជួបគ្នាបែបនេះ បន្ទាប់ពីមេដឹកនាំកូរ៉េខាងជើង លោក គីម ជុងអ៊ុន បានប្ដេជ្ញារំសាយកម្មវិធីអាវុធនុយក្លេអ៊ែររបស់ខ្លួន ខណៈដែលភាពតានតឹងបានថមថយរវាងប្រទេសទាំងពីរ។
ប្រសិនបើគ្មានអ្វីប្រែប្រួល លោក គីម គ្រោងនឹងជួបជជែកជាមួយប្រធានាធិបតីកូរ៉េខាងត្បូង លោក មូន ជែអ៊ីន នៅភូមិមួយឈ្មោះថា ផានម៉ុនជុម ដែលជាភូមិត្រូវបានប្រទេសទាំងពីរឯកភាពបែងចែកព្រំប្រទល់នឹងគ្នា៕
