អាជ្ញាធរអវកាសចិន បាននិយាយថា ស្ថានីយ៍អវកាសរបស់ខ្លួនឈ្មោះថា Tiangong-1 បានធ្លាក់ចូលក្នុងស្រទាប់បរិយាកាសផែនដី ហើយផ្ទុះឆេះនៅកណ្ដាលមហាសមុទ្រប៉ាស៊ីហ្វិកភាគខាងត្បូងនៅថ្ងៃនេះ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
អាជ្ញាធរអវកាសចិន បាននិយាយក្នុងសេចក្ដីប្រកាសព័ត៌មានដ៏ខ្លីនៅលើវេបសាយរបស់ខ្លួនថា ស្ថានីយ៍អវកាសនោះ ភាគច្រើនបានផ្ទុះឆេះនៅពេលធ្លាក់ចូលស្រទាប់បរិយាកាសផែននៅម៉ោងប្រហែល ៨ និង ១៥នាទីព្រឹកថ្ងៃនេះ ប៉ុន្តែ ពុំបានបញ្ជាក់ច្បាស់លាស់ថា បំណែកនៃស្ថានីយ៍អវកាសនោះ អាចធ្លាក់ទៅកន្លែងណានោះទេ។
កាលពីដំបូង អាជ្ញាធរនេះបាននិយាយថា ស្ថានីយ៍នោះត្រូវគេរំពឹងថា នឹងធ្លាក់មកចូលក្នុងស្រទាប់បរិយាកាសនៅឆ្នេរប្រទេសប្រេស៊ីល នៅមហាសមុទ្រអាត្លង់ទិចខាងលិច ជិតទីក្រុង Sao Paulo និងទីក្រុងរីយ៉ូ ដឺជេណឺរ៉ូ។
ក្រុមគ្រប់គ្រងអវកាសនៃកងទ័ពជើងអាកាសអាមេរិក ដែលបានតាមដាន និងចាប់យកគ្រប់វត្ថុសិប្បនិម្មិតនៅក្នុងគន្លងផែនដីនោះ បាននិយាយថា ខ្លួនក៏បានតាមដានស្ថានីយ៍អវកាស Taingong-1 ផងដែរ អំឡុងពេលវាធ្លាក់ចូលក្នុងស្រទាប់បរិយាកាសផែនដីនៅមហាសមុទ្រប៉ាស៊ីហ្វិកភាគខាងលិចនោះ។
ក្រុមនេះបាននិយាយក្នុងសេចក្ដីប្រកាសព័ត៌មានមួយថា ខ្លួនបានបញ្ជាក់អំពីបញ្ហានេះជាមួយដៃគូនានានៅអូស្ត្រាលី កាណាដា បារាំង អាល្លឺម៉ង់ អ៊ីតាលី ជប៉ុន កូរ៉េខាងត្បូង និងចក្រភពអង់គ្លេស។
តារាវិទូប្រចាំសាកលវិទ្យាល័យជាតិអូស្ត្រាលី លោក Brad Tucker បាននិយាយថា បំណែកស្ថានីយ៍ Tiangong-1 ហាក់ដូចជាបានធ្លាក់នៅចម្ងាយប្រហែល ១០០គីឡូម៉ែត្រ ភាគពាយព្យនៃប្រទេសតាហ៊ីទី។
ស្ថានីយ៍អវកាស Tiangon-1 ឬមានន័យថា «រាជវាំងឋានសួគ៌» នោះ ត្រូវបានបាញ់បង្ហោះនៅក្នុងឆ្នាំ២០១១ ដើម្បីភ្ជាប់យានអវកាស និងការពិសោធក្នុងគន្លងផែនដី ដែលជាផ្នែកមួយនៃកម្មវិធីអវកាសរបស់ប្រទេសចិន ដែលមានបំណងដំឡើងស្ថានីយ៍អវកាសអចិន្ត្រៃយ៍មួយនៅក្នុងគន្លងផែនដីនៅត្រឹមឆ្នាំ២០២៣៕