នៅក្នុងសង្គ្រាមពាណិជ្ជកម្មរវាងអាមេរិក និងចិន នៅថ្ងៃនេះ ចិនបានសម្រេចឆ្លើយតបទៅនឹងអាមេរិកវិញ ដោយបានសម្រេចដាក់ពន្ធគយលើទំនិញនាំចូលពីអាមេរិកដល់ទៅ ១២៨មុខ មានតម្លៃ ៣ពាន់លានដុល្លារ ក្នុងនោះមានទាំងផ្លែឈើ និងសាច់ជ្រូក។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ការសម្រេចបែបនេះរបស់ចិន ត្រូវបានគេចាត់ទុកជាការសងសឹកទៅរដ្ឋបាលប្រធានាធិបតីអាមេរិក លោក ដូណាល់ ត្រាំ ដែលបានសម្រេចដាក់ពន្ធគយលើការនាំចូលដែកថែប និងអាលុយមីញ៉ូមពីប្រទេសចិន ដោយជំរុញឲ្យមានក្ដីបារម្ភអំពីសង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចទាំងពីរនេះ។
លោក ដូណាល់ ត្រាំ បានថ្លែងម្ដងហើយម្ដងទៀតប្រឆាំងនឹងអតុល្យភាពពាណិជ្ជកម្មជាមួយប្រទេសចិន ដោយមេដឹកនាំអាមេរិករូបនេះ បានសន្យាអំឡុងពេលយុទ្ធនាការបោះឆ្នោតកាលពីឆ្នាំ២០១៦ថា នឹងលុបបំបាត់ចោលនូវឱនភាពពាណិជ្ជកម្មរបស់អាមេរិក។
ជាការឆ្លើយតប ក្រុងប៉េកាំងបានព្រមានកាលពីខែមុនថា ខ្លួនក៏នឹងពិចារណាដាក់របាំងពន្ធគយ ១៥ភាគរយ និង ២៥ភាគរយ ទៅលើផលិតផលនានា ដែលក្នុងនោះមានទាំងស្រា គ្រាប់ធញ្ញជាតិ និងអាលុយមីញ៉ូមផងដែរ។
ទីភ្នាក់ងារព័ត៌មានរដ្ឋចិនស៊ិនហួ ដែលបានដកស្រង់សេចក្ដីប្រកាសព័ត៌មានរបស់ក្រសួងហិរញ្ញវត្ថុចិននោះ បានចុះផ្សាយថា សេចក្ដីសម្រេចថ្មីនេះ នឹងចូលជាធរមានចាប់ពីថ្ងៃនេះតទៅ។
សេចក្ដីសម្រេចបែបនេះ គឺជាការឆ្លើយតបរបស់ចិន ទៅនឹងអាមេរិក ដែលបានសម្រេចដំឡើងពន្ធគយ ១០ភាគរយទៅលើផលិតផលអាលុយមីញ៉ូម និង ២៥ភាគរយ ទៅលើដែកថែបនាំចូលពីបណ្ដាប្រទេសជាសម្ព័ន្ធមិត្តអាមេរិកផងដែរ។
ទោះជាយ៉ាងណា លោក ត្រាំ បានផ្អាកជាបណ្ដោះអាសន្ននូវការដកហូតពន្ធគយពីសហភាពអឺរ៉ុប ប្រទេសអាហ្សង់ទីន អូស្ត្រាលី ប្រេស៊ីល កាណាដា ម៉ិកស៊ិក និងកូរ៉េខាងត្បូង បន្ទាប់ពីបណ្ដាប្រទេសទាំងនេះអាក់អន់ស្រពន់ចិត្តនឹងអាមេរិក
មេដឹកនាំអាមេរិករូបនេះ ក៏បានបញ្ចេញផែនការដកហូតពន្ធគយថ្មីទៅលើការនាំចូលផលិតផលចិនមានតម្លៃប្រហែល ៦០ពាន់លានដុល្លារ ជុំវិញអ្វីដែលអាមេរិកចោទចិនថា «លួច»កម្មសិទ្ធិបញ្ញា។
ជាមួយគ្នានេះដែរ ចិនបានអំពាវនាវទៅអាមេរិកឲ្យបញ្ឈប់ «ការគំរាមកំហែងផ្នែកសេដ្ឋកិច្ច» និងបានព្រមានសងសឹកវិញ៕