ទីបំផុតទៅ ជប៉ុនបានដាក់ឲ្យដំណើរការជាដំបូងនូវកងទ័ពជើងទឹករបស់ខ្លួន គិតចាប់តាំងពីក្រោយសង្គ្រាមលោកលើកទី២មក ដើម្បីប្រឆាំងទៅនឹងអ្វីដែលជប៉ុនហៅថា ពួកឃ្លានពានដណ្ដើមកាន់កាប់បណ្ដាកោះរបស់ជប៉ុននៅសមុទ្រចិនខាងកើត ដែលក្រុងតូក្យូព្រួយបារម្ភថា អាចធ្លាក់ទៅក្នុងកណ្ដាប់ដៃរបស់ចិន។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters បានចុះផ្សាយបន្តថា ពិធីដាក់ឲ្យដំណើរការឡើងវិញនូវកងទ័ពជើងទឹកជប៉ុននោះ ត្រូវបានរៀបចំធ្វើឡើងនៅឯមូលដ្ឋានកងទ័ពនៅជិតទីក្រុងសាសេបូ ភាគនិរតីនៃកោះឃ្យូស៊ូ ដោយមានសមាជិកយោធាប្រហែល ១៥០០នាក់ ស្លៀកពាក់ឈុតប៉ារ៉ាឈរតម្រង់ជួរនៅខាងក្រៅចំពេលអាកាសធាតុត្រជាក់។
Reuters បានដកស្រង់សម្ដីអនុរដ្ឋមន្ត្រីការពារជាតិជប៉ុន លោក តូម៉ូហ៊ីរ៉ូ យ៉ាម៉ាម៉ូតូ ដែលបានថ្លែងថា ដោយសារតែស្ថានភាពការពារជាតិ និងសន្តិសុខនៅជុំវិញប្រទេសជប៉ុនកាន់តែលំបាក ការការពារដែនដីកោះ បានក្លាយជាភារកិច្ចដ៏សំខាន់។
ការបង្កើតឡើងវិញនូវកងទ័ពជើងទឹកជប៉ុននេះ គឺជារឿងដ៏ចម្រូងចម្រាស់ ដោយសារតែកងទ័ពនេះអាចបង្កើនកម្លាំងយោធា ហើយក្រុមអ្នករិះគន់ចាត់ទុកថា អាចត្រូវបានគេប្រើប្រាស់ដើម្បីគំរាមកំហែងដល់ប្រទេសជិតខាងជប៉ុន។ ម្យ៉ាងវិញទៀត រដ្ឋធម្មនុញ្ញនៅក្រោយសង្គ្រាមលោកលើកទី២ បានហាមឃាត់ជប៉ុនមិនឲ្យបង្កសង្គ្រាមនោះឡើយ៕