វិទ្យុអាស៊ីសេរី បានបដិសេធជុំវិញការចោទប្រកាន់របស់លោក ហ៊ុន សែន ទៅលើលោក ហួត វុទ្ធី ហៅ ជុន ច័ន្ទបុត្រ អនុប្រធានវិទ្យុអាស៊ីសេរីជាភាសាខ្មែរជថា ជាផ្ទៃក្នុងរបស់រដ្ឋាភិបាល និងបក្សកាន់អំណាច។
ក្នុងពិធីជួបជាមួយក្រុមអ្នកគាំទ្រនៅប្រទេសអូស្ដ្រាលីកាលពីថ្ងៃទី១៦ ខែមីនាកន្លងទៅ លោកនាយករដ្ឋមន្ដ្រី ហ៊ុន សែន បានថ្លែងថា លោក ជុន ច័ន្ទបុត្រ បានទាក់ទងជាមួយលោក ហ៊ុន ម៉ាណែត និងលោក ម៉ៅ សុផាន់ មេបញ្ជាការកងពលលេខ៧០ ដើម្បីឲ្យជួយការពារសុវត្ថិភាពផ្ទាល់ខ្លួន ដោយថា ខ្លាចចារកម្មអាមេរិកសម្លាប់។
បន្ថែមលើនោះថ្មីៗនេះ សារព័ត៌មាន ដែលស្និទ្ធនឹងរដ្ឋាភិបាល បានបញ្ចេញឃ្លីបសំឡេងសន្ទនារវាង លោក ជុន ច័ន្ទបុត្រ និងឧត្តមសេនីយ៍ឯក ម៉ៅ សុផាន់ ជាបន្តបន្ទាប់ មានដូចជា ការសុំឲ្យជួយការពារសុវត្ថិភាព និងរឿងទាក់ទងនឹងគណបក្សប្រឆាំងជាដើម។
ទាក់ទងនឹងការចោទនោះ វិទ្យុអាស៊ីសេរីបានចេញសេចក្ដីប្រកាសព័ត៌មាននៅថ្ងៃនេះថា៖ «ការចោទប្រកាន់ចុងក្រោយ ទាំងអំបាលម៉ាននេះ មិនត្រឹមតែជាអំពើខ្វះភាពសុចរិត និងខ្វះសច្ចៈប៉ុណ្ណោះទេ ប៉ុន្តែ វាជាឆាកកំប្លែងឆ្កួតលីលាមួយ ដែលលោកនាយករដ្ឋមន្ត្រី ហ៊ុន សែន នៅតែចិញ្ចឹមចិត្ត យកមកថ្លែងជាសាធារណៈ ហើយបន្តឲ្យប្រព័ន្ធផ្សព្វផ្សាយ ដែលជាឧបករណ៍ឃោសនា និងជាសត្វសេករបស់លោក ខំបំពងសំឡេងបន្ថែម»។
វិទ្យុអាស៊ីសេរីក៏លើកឡើងដែរថា បុគ្គលិកអាស៊ីសេរីលោក ជុន ច័ន្ទបុត្រ មិនបានរំលោភគោលការណ៍របស់ស្ថាប័នអាស៊ីសេរីនោះទេ ចំពោះការទាក់ទងរកប្រភពផ្សេងៗ ដើម្បីរកលទ្ធភាពជួបសម្ភាសជាមួយលោកនាយករដ្ឋមន្ត្រី ហ៊ុន សែន កាលពីឆ្នាំមុននោះ។
វិទ្យុអាស៊ីសេរីថា លោក ហួត វុទ្ធី ពិតជាបានជូនដំណឹងជាផ្លូវការទៅថ្នាក់ដឹកនាំរបស់អាស៊ីសេរី អំពីជំនួបជាមួយមន្ត្រីរបបលោក ហ៊ុន សែន និងបានកត់ត្រាទុកនូវកិច្ចសន្ទនាគ្នាជាមួយលោក ហ៊ុន ម៉ាណែត និង លោក ម៉ៅ សុផាន់ នោះផងដែរ។
សេចក្ដីប្រកាសព័ត៌មានដដែលនោះបន្តថា ការមួលបង្កាច់ការពិត និងបញ្ចេញខ្សែអាត់សំឡេងតែមួយផ្នែក ហើយកែ និងកាត់តផង គឺគ្មានបង្ហាញអ្វីក្រៅពីភស្តុតាង ដែលសបញ្ជាក់ឲ្យឃើញច្បាស់ថា អាជ្ញាធរកំពុងប៉ុនប៉ងបន្សាបសំឡេងឯករាជ្យ។
ទោះអាស៊ីសេរីថា វិទ្យុរបស់ខ្លួន បានព្យាយាមអញ្ជើញលោកនាយករដ្ឋមន្ត្រី ហ៊ុន សែន និង មន្ត្រីរបស់លោក ជាច្រើនលើកច្រើនសា ដើម្បីសុំសម្ភាស និងសុំឲ្យពួកគេបំភ្លឺនូវការចោទប្រកាន់ទាំងអស់នោះ ប៉ុន្តែ លោក ហ៊ុន សែន និង មន្ត្រីរបស់លោក មិនព្រមផ្ដល់បទសម្ភាសន៍ទេ តែបែរជាជ្រើសរើសយកវិធីមិនសុចរិត បំភ័ន្តមតិ ដើម្បីបង្កើនការបង្ក្រាបលើសេរីភាពសារព័ត៌មាន ទៅវិញ៕
