សេចក្ដីរាយការណ៍នានា បានឲ្យដឹងថា ស្ថាបនិក និងជាអគ្គនាយកក្រុមហ៊ុនបណ្ដាញសង្គម Facebook លោក Mark Zuckerberg នឹងជួបប្រជុំជាមួយក្រុមសមាជិកសភាមួយចំនួនរបស់អាមេរិកនៅថ្ងៃស្អែកនេះ មួយថ្ងៃមុននឹងលោកត្រូវបង្ហាញខ្លួននៅក្នុងកិច្ចប្រជុំសភាមួយ ជុំវិញការប្រើប្រាស់ព័ត៌មានផ្ទាល់ខ្លួនរបស់អ្នកប្រើប្រាស់បណ្ដាញសង្គមមួយនេះ។
ទីភ្នាក់ងារព័ត៌មាន Reuters បានដកស្រង់សម្ដីជំនួយការ ២រូបរបស់សមាជិកសភា ដែលបាននិយាយថា គម្រោងជំនួបនេះ ត្រូវបានគេរំពឹងថា នឹងមានការចូលរួមពីក្រុមសមាជិកសភាមកពីគណៈកម្មាធិការនានាក្នុងសភា មុននឹងលោក Zuckerberg ឡើងឆ្លើយបំភ្លឺនៅក្នុងសភា ប៉ុន្តែ Reuters មិនបានបង្ហាញឈ្មោះជំនួយការទាំងពីររូបដែលបានទម្លាយព័ត៌មាននេះនោះទេ។
Reuters ក៏បានស្វែងរកការបកស្រាយពីក្រុមហ៊ុន Facebook ផងដែរ ប៉ុន្តែ ក្រុមហ៊ុនបានបដិសេធផ្ដល់ព័ត៌មានលម្អិត។
ទោះជាយ៉ាងណា លោក Zuckerberg នឹងត្រូវចូលឆ្លើយបំភ្លឺបន្ថែមទៀត នៅមុខគណៈកម្មាធិការចម្រុះនៅក្នុងព្រឹទ្ធសភាអាមេរិក និងរដ្ឋសភានៅថ្ងៃពុធខាងមុខនេះ។
ប៉ុន្មានសប្ដាហ៍មកនេះ ក្រុមហ៊ុន Facebook បានស្ថិតនៅក្រោមការរិះគន់ បន្ទាប់ពីនិយាយថា ព័ត៌មានផ្ទាល់ខ្លួនរបស់អ្នកប្រើប្រាស់បណ្ដាញសង្គមមួយនេះរហូតដល់ ៨៧លាននាក់ ដែលភាគច្រើននៅអាមេរិក អាចត្រូវបានគេចែករំលែកជាមួយក្រុមហ៊ុនផ្ដល់ប្រឹក្សាយោបល់ផ្នែកនយោបាយ Cambridge Analytica៕