មន្ត្រីសង្គមស៊ីវិល និងប្រជាពលរដ្ឋនៅខេត្តក្រចេះបានសរសេរសារលើហ្វេសប៊ុកអំពាវនាវទៅរដ្ឋាភិបាលឲ្យជួយរកយុត្តិធម៌ជូនអ្នកប្រើទឹកព្រែកទេរ ពុលស្លាប់១៣នាក់នៅខេត្តក្រចេះ ក្រោយពីក្រសួងបីចេញសេក្តីបំភ្លឺផ្សេងគ្នាជុំវិញការស្លាប់នោះ។
ក្រោយពីស្លាប់ភ្លាម រដ្ឋមន្ត្រីក្រសួងឧស្សាហកម្ម និងសប្បកម្មលោក ចម ប្រសិទ្ធ កាលពីថ្ងៃ១៧ខែឧសភា ប្រាប់អ្នកសារព័ត៌មានថា ទឹកព្រែកទេរមានសារធាតុគីមីម្យ៉ាងឈ្មោះស្យានីដដែលសាធាតុពុលនេះ គេប្រើសម្រាប់លាងរ៉ែមាស។
ប៉ុន្តែក្រោយមកមិនបានប៉ុន្មានថ្ងៃផង លោក ចម ប្រសិទ្ធ បានចុះហត្ថលេខារួមគ្នា ជាមួយរដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងរដ្ឋមន្ត្រីក្រសួងរ៉ែ និងថាមពល លោក ស៊ុយ សែម បំភ្លឺថា ករណីពុលនៅឃុំកន្ទួត ស្រុកចិត្តបុរីនេះ មកពីស្រា ស និងសារធាតុគីមីពុលសម្លាប់ស្មៅ និងសត្វល្អិតទៅវិញ។
ករណីនេះត្រូវបានមន្ត្រីអង្គការក្រៅរដ្ឋាភិបាលមួយរូបអ្នកនាង ឡុង គឹមហ៊ាង ប្រើបណ្តាញសង្គម ដើម្បីសរសេរបង្ហោះផ្ញើសារជំរុញទៅរដ្ឋាភិបាលឲ្យស្វែងរកយុត្តិធម៌ដល់ជនរងគ្រោះដែលស្លាប់ ១៣នាក់នៅខេត្តក្រចេះ ដោយថាករណីស្លាប់នោះហាក់ស្ងប់ស្ងាត់ទៅវិញ ទំនងជាមិនមានដំណោះស្រាយជូនអ្នករងគ្រោះ។
អ្នកនាង គឹមហ៊ាង បញ្ជាក់ថា បើរដ្ឋាភិបាលមិនស្វែងរកយុត្តិធម៌ឲ្យអ្នករងគ្រោះនោះទេ នៅថ្ងៃក្រោយភាពអយុត្តិធម៌នៅតែបន្តកើតមាន។
មន្ត្រីអង្គការក្រៅរដ្ឋាភិបាលមួយរូបអ្នកនាង ឡុង គឹមហ៊ាង
លោក ជ័យ អូន ដែលអះអាងថា ឪពុក និងប្អូន សាច់ញាតិរបស់គាត់ បានសម្រាកនៅមន្ទីរពេទ្យរយៈពេលខ្លី ដោយសារប្រើទឹកព្រែកទេរ ពុល ប៉ុន្តមិនបណ្តាលឲ្យស្លាប់ដូចអ្នកទាំង១៣នាក់នោះទេ។ លោកបញ្ជាក់ថា ធ្លាប់អំពាវនាវទៅរដ្ឋាភិបាលច្រើនដងមកហើយ ដើម្បីឲ្យជួយរកយុត្តិធម៌ឲ្យអ្នករងគ្រោះ ប៉ុន្តែលោកថារហូតមកដល់ពេលនេះមិនទាន់មានយុត្តិធម៌នៅឡើយ។
ទោះជាយ៉ាងណាលោកអំពាវនាវទៅរដ្ឋាភិបាលជាថ្មីទៀតឲ្យជួយរកយុត្តិធម៌ ដោយថាកុំឲ្យពួកគេរងភាពអយុត្តិធម៌។
លោកអំពាវនាវថា «ឲ្យរកយុត្ថិធម៌ដូចថា ជូនជាសំណង ជាប្រាក់ ជាថវិកា ជួយខាងគ្រួសារសពធ្វើបុណ្យធ្វើទានទៅ ហើយនិងសោហ៊ុយថ្លៃព្យាបាល»។
លោក ផាត់ ឈុំ មេភូមិស្រែណន និងមេប៉ុស្តិ៍ឃុំកន្ទួតលោក ផុល ភា បានអះអាងប្រហាក់ប្រហែលគ្នាថា សុំមិនធ្វើការបកស្រាយជុំវិញករណីនេះ ដោយបង្វែរសំនួរឲ្យទៅសួរថ្នាក់លើវិញ។ ប៉ុន្តែVOD មិនអាចសុំការបំភ្លឺពីអភិបាលខេត្តក្រចេះ លោក វ៉ា ថន បានទេ។
មេធាវី សំ សុគង់ បានពន្យល់តាមនីតិវិធីច្បាប់ថា បទល្មើសព្រហ្មទណ្ឌមិនចាំបាច់សាច់ញាតិជនរងគ្រោះដាក់ពាក្យប្តឹងទៅសមត្ថកិច្ច ឬតុលាការនោះទេ ពោលតុលាការត្រូវបានកាតព្វកិច្ចសហការជាមួយមន្ត្រីនគរបាលយុត្តិធម៌ចុះធ្វើការស្រាវជ្រាវលើបញ្ហាទាំងនោះ ដោយថាដើម្បីស្វែងរកការពិតជូនជនរងគ្រោះ។
លោកមេធាវី សំ សុគង់
យ៉ាងណាក៏ដោយ ក្រសួងទាំងបីបានអះអាងក្នុងសេចក្តីថ្លែងការណ៍រួមនោះថា ក្រសួងឧស្សាហកម្ម និងសិប្បកម្ម ក្រសួងរ៉ែ និងថាមពល និងក្រសួងសុខាភិបាល នឹងបន្តសហការគ្នា ដើម្បីបង្ការទប់ស្កាត់ និងជៀសវាងនូវបញ្ហាដែលកើតឡើងជាយថាហេតុ៕
