គណបក្សឆន្ទៈខ្មែរ ដែលទើបតែមានឈ្មោះក្នុងការបោះឆ្នោតជាតិខែកក្កដាខាងមុខ បានគាំទ្រចំពោះចំណាត់ការអាមេរិកចំពោះការបង្កកទ្រព្យសម្បត្តិមេអង្គរក្សលោកនាយករដ្ឋមន្ត្រី ហ៊ុន សែន។
សេចក្តីថ្លែងការណ៍កាលពីថ្ងៃម្សិលមិញ គណបក្សឆន្ទៈខ្មែរឲ្យដឹងថា ខ្លួនមានជំនឿលើទណ្ឌកម្មបង្កកទ្រព្យសម្បត្តិ និងបិទទិដ្ឋាការចូលសហរដ្ឋអាមេរិកលើ លោក ហ៊ីង ប៊ុនហៀង ពិតជាមានហេតុផលត្រឹមត្រូវ និង ចង់ឲ្យអាមេរិកដាក់ទណ្ឌកម្មលើអ្នកដែលបំផ្លាញប្រជាធិបតេយ្យ និងរំលោភសិទ្ធមនុស្សនៅកម្ពុជាបន្តទៀត។
គណបក្សឆន្ទៈខ្មែរក៏ស្នើសុំឲ្យអាមេរិកកុំយកចំណាត់ការនេះជាថ្នូរនយោបាយ និងទម្លាក់ចោលវិធានការខាងលើឲ្យសោះ។
គណបក្សឆន្ទៈខ្មែរ ត្រូវបានបង្កើតឡើងដោយកូនប្រុសពៅលោក គង់ គាំ ដែលជាអតីតសមាជិកជាន់ខ្ពស់គណបក្សសង្គ្រោះជាតិ កាលពីខែមេសាកន្លងទៅនេះ។