ពលរដ្ឋខ្មែររាប់ពាន់នាក់ដែលរស់នៅ និងធ្វើការនៅប្រទេសកូរ៉េខាងត្បូងបានប្រមូលផ្ដុំគ្នា តវ៉ាប្រឆាំងទៅនឹងការបោះឆ្នោតនៅថ្ងៃទី ២៩ ខែ កក្ដដាខាងមុខ និងទាមទារឲ្យជប៉ុនបញ្ឈប់ការគាំទ្រ ។
បើតាមអ្នករៀបចំការតវ៉ា លោក យឹម ស៊ីណន បានឲ្យដឹងថានៅថ្ងៃទី ២៤ ខែ មិថុនានេះ អតីតតំណាងរាស្ត្របក្សសង្រ្គោះជាតិលោកស្រី មួរ សុខហួរ រួមជាមួយពលរដ្ឋខ្មែរធ្វើការនិង រស់នៅប្រទេសកូរ៉េខាងត្បូងជាង ៥ពាន់នាក់ បានប្រមូលផ្ដុំគ្នាតវ៉ានៅទីក្រុងសេអ៊ូល ដើម្បីប្រឆាំងទៅនឹងការបោះឆ្នោតជ្រើសតាំងតំណាងរាស្ត្រក្នុងពេលខាងមុខ។
សកម្មជនតវ៉ាទាំងនោះបានលើកបដា ទាមទារឲ្យប្រទេសជប៉ុនបញ្ឈប់ការគាំទ្រលើដំណើរការបោះឆ្នោតជាតិខាងមុខ ដោយពួកគេចាត់ទុកថាការបោះឆ្នោតនោះគឺជា «ការបោះឆ្នោតក្លែងក្លាយ» ហើយពួកគេក៏បានស្រែកទាមទារឲ្យមានការដោះលែងប្រធានអតីតបក្សសង្រ្គោះជាតិលោក កឹម សុខា ផងដែរ។
បើតាមលោក យីម ស៊ីណន បន្ថែមថាសកម្មជនតវ៉ាទាំងនោះអំពាវនាវឲ្យប្រទេសជិតខាងរបស់កម្ពុជាមានចិន វៀតណាម ឡាវ និង ថៃ គោរពនូវសិទ្ធិរបស់ពលរដ្ឋកម្ពុជា និងជំរុញកុំឲ្យទទួលស្គាល់ការបោះឆ្នោតជាតិខាងមុខ និងបញ្ឈប់គាំទ្ររដ្ឋាភិបាលដែលចេញពីការបោះឆ្នោតនេះ។
លោក យីម ស៊ីណន បន្ថែមថាក្នុងការតវ៉ានោះពួកគេក៏បានយកញាត្តិដែលមានស្នាមមេដៃអ្នកគាំទ្រជាង ៥ពាន់នាក់ ទៅដាក់នៅស្ថានទូតជប៉ុន ប្រចាំនៅប្រទេសកូរ៉េ ខាងត្បូងផងដែរ។
ទាក់ទងនឹងបញ្ហានេះរដ្ឋាភិបាលកម្ពុជាធ្លាប់បានអះអាងដដែលៗថា ការបោះឆ្នោតនៅកម្ពុជានឹងប្រព្រឹត្តទៅដោយសេរី ត្រឹមត្រូវ និង យុត្តិធម៌ ប្រជាធិបតេយ្យសេរីពហុបក្ស ទោះបីជាគ្មានវត្តមានបក្សសង្គ្រោះជាតិចូលរួមក៏ដោយ ព្រោះមានគណបក្សចំនួន២០ប្រកួតប្រជែង និងមានអង្កេតការណ៍ជាតិ-អន្តរជាតិចូលរួម។
កាលពីសប្ដាហ៍មុនប្រជាពលរដ្ឋខ្មែររស់នៅប្រទេសជប៉ុនក៏បាននាំគ្នាតវ៉ាដោយដាក់ញត្តិទៅកាន់ស្ថានទូតជប៉ុនដែរ ដោយស្នើឲ្យប្រទេសនោះបញ្ឈប់ការគាំទ្រការបោះឆ្នោតនៅកម្ពុជា។
ប៉ុន្ដែ ប្រទេសលោកសេរីមួយចំនួន បានព្រមានមិនទទួលស្គាល់លទ្ធផលនៃការបោះឆ្នោតខាងមុខនេះទេ បន្ទាប់ពីបន្ទាប់ពីអតីតគណបក្សប្រឆាំងដ៏ធំនៅកម្ពុជា ត្រូវបានរំលាយចោល ហើយអាសនៈរបស់អតីតបក្សប្រឆាំង ត្រូវបានបែងចែកឲ្យទៅគណបក្សផ្សេង៕
