ថ្លែងនៅចំពោះមុខកម្មករជាង២ម៉ឺននាក់ក្នុងខេត្តកំពង់ឆ្នាំងនៅព្រឹកថ្ងៃទី២៧ មិថុនានេះ លោកនាយករដ្ឋមន្ត្រីហ៊ុន សែន បានអំពាវនាវដល់ម្ចាស់ក្រុមហ៊ុនដឹកជញ្ជូន និងរថយន្តឈ្នួលទាំងអស់កុំឲ្យតម្លើងថ្លៃឈ្នួលរថយន្តក្នុងពេលដែលកម្មករជិះទៅបោះឆ្នោតនាពេលខាងមុខ។ លោកនាយករដ្ឋមន្រ្តីបានបញ្ជាក់ថានឹងមិនមានសេវារថយន្តក្រុងរដ្ឋសម្រាប់ដឹកជញ្ជូនពលរដ្ឋដូចកាលចូលឆ្នាំនោះទេ ដោយសារមានតម្រូវការនៅភ្នំពេញ។ ជាមួយគ្នានេះលោកនាយករដ្ឋមន្ត្រីហ៊ុន សែន បានអំពាវនាវឲ្យកម្មករចេញទៅបោះឆ្នោតឲ្យបានគ្រប់គ្នាផងដែរ។
លោកនាយករដ្ឋមន្ត្រី ហ៊ុន សែន
រដ្ឋាភិបាលបានអនុញ្ញាតឲ្យមានការឈប់សម្រាករយៈពេល៣ថ្ងៃគឺចាប់ពីថ្ងៃទី ២៨ដល់ថ្ងៃទី៣០ កក្កដាខាងមុខ ដើម្បីឲ្យពលរដ្ឋទៅបោះឆ្នោត។
ការបោះឆ្នោតថ្នាក់ជាតិជ្រើសតាំងតំណាងរាស្ត្រអាណត្តិទី៦ នឹងចាប់ផ្តើមនៅថ្ងៃទី២៩ កក្កដា ដែលមានគណបក្សនយោបាយចំនួន២០ ចូលរួមប្រកួតប្រជែង។
រដ្ឋាភិបាលបានសម្រេចបញ្ចេញរថយន្តក្រុងរបស់រដ្ឋចំនួន៦០គ្រឿង ដើម្បីដឹកជញ្ជូនប្រជាពលរដ្ឋដោយមិនគិតថ្លៃពីរាជធានីភ្នំពេញ ទៅកាន់បណ្តាខេត្តនានា ចាប់ពីថ្ងៃទី១២ដល់ថ្ងៃទី១៨ ខែមេសា គឺនៅមុនពេលនិងក្រោយពេលពិធីបុណ្យចូលឆ្នាំថ្មីប្រពៃណីជាតិខ្មែរ៕
