ថ្លែងក្នុងពិធីជួបជាមួយកម្មករជាង២ម៉ឺននាក់នៅខេត្តកំពង់ឆ្នាំង នៅព្រឹកថ្ងៃទី២៧ មិថុនានេះលោក ហ៊ុន សែន បានថ្លែងឈប់ឲ្យគណបក្សដទៃសង្ឃឹមពីការវាយបករបស់លោកចំពោះបក្សទាំងនោះ ដោយថាការវាយបករបស់លោកចំពោះបក្សមួយនោះក្នុងរយៈពេលកន្លងមកវាគ្រប់គ្រាន់ហើយសម្រាប់បក្សមួយនោះធ្វើជាដើមទុនសម្រាប់ធ្វើនយោបាយ និងក៏បានផ្តល់ផលប្រយោជន៍ដល់លោកផងដែរ។
លោកនាយករដ្ឋមន្ត្រី ហ៊ុន សែន
តែទោះជាយ៉ាងណាលោក ហ៊ុន សែន បានប្រកាសបើកចំហរក្នុងការប្រកួតប្រជែងគោលនយោបាយជាមួយបក្សទាំងនោះ។
ថ្វីត្បិតតែលោកមិនបានបញ្ចេញឈ្មោះបក្សនោះក៏ពិតមែន តែក្នុងមួយរយៈពេលចុងក្រោយនេះលោកបានធ្វើការវាយប្រហារជាច្រើនទៅលើបក្សប្រជាធិបតេយ្យមូលដ្ឋានដែលបានសម្រេចចូលរួមក្នុងការបោះឆ្នោតនាពេលខាងមុខ។
អ្នកនាំពាក្យគណបក្សប្រជាធិបតេយ្យមូលដ្ឋានលោក សាម អ៊ីន ពុំមានយោបល់ទៅលើការលើកឡើងរបស់លោកហ៊ុន សែននោះទេដោយថាជាយុទ្ធសាស្ត្រនយោបាយផ្ទាល់ខ្លួន។ លោកថាគណបក្សប្រជាធិបតេយ្យមូលដ្ឋាននៅតែធ្វើការរិះគន់រដ្ឋាភិបាលក្នុងន័យស្ថាបនាដដែល បើទោះបីគណបក្សប្រជាជននៅតែរក្សាការមិនឆ្លើយតប។
អ្នកនាំពាក្យគណបក្សប្រជាធិបតេយ្យមូលដ្ឋានលោក សាម អ៊ីន
ប្រធានក្រុមអ្នកវិភាគវ័យក្មេងលោក ហង្ស វិទូ យល់ថាយុទ្ធសាស្ត្ររបស់លោកនាយករដ្ឋមន្ត្រីហ៊ុន សែន នេះជាយុទ្ធសាស្ត្រដែលគ្មានភាពចាស់ទុំ និងដដែលៗ ដោយលោកថាប្រជាប្រិយភាពរបស់បក្សណាមួយមានភាពល្បីល្បាញនោះមិនអាស្រ័យលើការឆ្លើយតបរបស់បក្សប្រជាជននោះទេ។
លោកថា៖ « រឿងប្រជាប្រិយភាព និងមិនមានប្រជាប្រិយភាពនេះ អាស្រ័យទៅលើ គោលនយោបាយ និងអត្តចរិតរបស់មេដឹកនាំផ្ទាល់តែម្តងមិនមែន អាស្រ័យទៅលើលោកហ៊ុន សែន គាត់និយាយទៅលើគណបក្សណា គណបក្សហ្នឹងមានប្រជាប្រិយភាពហើយប្រជាពលរដ្ឋបោះឆ្នោតគាំទ្រទេ វាអត់មានអញ្ចឹង! […] ដោយឡែកបក្សប្រជាធិបតេយ្យមូលដ្ឋានមិនមែនមានប្រជាប្រិយដោយសារគាត់(លោកហ៊ុន សែន) និយាយពីបក្សប្រជាធិបតេយ្យមូលដ្ឋានទេ។ គណបក្សមួយៗ មានភាពល្បីល្បាញ និងប្រជាប្រិយភាពដោយសារតែវប្បធម៌នៃការដឹកនាំរបស់ពួកគេ ដោយសារតែគោលនយោបាយរបស់គេហ្នឹងបានឆ្លើយតបទៅនឹងប្រជាពលរដ្ឋច្រើនជាង» ។
នៅតែជាង១ខែទៀតទេ កម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៦ ដោយមានគណបក្សនយោបាយចំនួន២០ ចូលរួមប្រកួតប្រជែង៕