នេះជាប្រតិកម្មរបស់ គ.ជ.ប តាមរយៈសេចក្តីថ្លែងការណ៍របស់ខ្លួនចេញកាលពីថ្ងៃអង្គារម្សិលមិញ ឆ្លើយតបទៅនឹងអង្គការសេរីអន្តរជាតិ ដែលបានទទូចឲ្យប្រទេសសេរីនៅក្នុងពិភពលោកកុំឲ្យទទួលស្គាល់លទ្ធផលបោះឆ្នោតនៅក្នុងប្រទេសកម្ពុជា។
គ.ជ.ប បានបញ្ជាក់ក្នុងសេចក្តីថ្លែងការណ៍របស់ខ្លួនថា គ្មាននរណា ឬប្រទេសណា មករារាំងដំណើរការបោះឆ្នោតដែលប្រព្រឹត្តទៅស្របតាមបែបប្រជាធិបតេយ្យសេរីពហុបក្សបាននោះទេ។ សេចក្តីថ្លែងការណ៍ដដែលបញ្ជាក់ថា ការបោះឆ្នោតជ្រើសរើសតំណាងរាស្រ្ដ និតិកាលទី៦ ត្រូវប្រព្រឹត្តទៅតាមការកំណត់ នៅថ្ងៃទី ២៩ ខែកក្កដា ឆ្នាំ២០១៨។
លោក សម រង្ស៊ី ប្រធានចលនាសង្គ្រោះជាតិ សរសេរបង្ហោះលើហ្វេសប៊ុករបស់លោកថា អង្គការសេរីនិយមអន្ដរជាតិ (Liberal International) បានអនុម័តញត្ដិមួយកាលពីថ្ងៃទី២២ ខែមិថុនា ស្ដីពីប្រទេសកម្ពុជា។ បើតាមលោក សម រង្ស៊ី ក្នុងញត្តិនោះអង្គការនេះ អំពាវនាវឲ្យរដ្ឋាភិបាលសេរីនិយមក្នុងពិភពលោក គាំទ្រការតស៊ូរបស់គណបក្សសង្រ្គោះជាតិ។ លោក សម រង្ស៊ី សរសេរក្នុងហ្វេសប៊ុករបស់លោកថាញត្តិនោះ ជាការដាក់ទណ្ឌកម្មលើរបបផ្ដាច់ការរបស់លោកហ៊ុន សែន និងមិនទទួលស្គាល់ការបោះឆ្នោតនៅថ្ងៃទី ២៩ កក្កដាខាងមុខនេះ។ បើតាមលោក សម រង្ស៊ី ញត្តិនោះក៏អំពាវនាវកុំឲ្យមានការទទួលស្គាល់រដ្ឋាភិបាលណាដែលកើតចេញពីការបោះឆ្នោតនេះផងដែរ។
គណៈកម្មាធិការជាតិរៀបចំបោះឆ្នោតបានលើកឡើងតាមរយៈសេចក្តីថ្លែងការណ៍របស់ខ្លួនថា ការទាមទារបស់អង្គការសេរីអន្តរជាតិនេះគឺបានធ្វើឲ្យមានការប៉ះពាល់ដល់តួនាទី និងភារកិច្ចរបស់ គ.ជ.ប។
អង្គការសេរីអន្ដរជាតិ (Liberal International) ដែលមានមូលដ្ឋាននៅចក្រភពអង់គ្លេស បានបើកកិច្ចប្រជុំរបស់ខ្លួនកាលពីថ្ងៃទី២២ មិថុនា នៅក្នុងទីក្រុងប៊ែកឡាំង ប្រទេសអាល្លឺម៉ង់។ អង្គការនេះមានសមាជិកប្រមាណ១០០គណបក្សនយោបាយទូទាំងពិភពលោក។ គណបក្សសង្គ្រោះជាតិគឺជាសមាជិកមួយក្នុងចំណោមសមាជិកទាំង១០០៕