រាជរដ្ឋាភិបាលកម្ពុជាសម្រេចបញ្ជូនបេសកកម្មពិសេសមួយទៅកាន់សហភាពអឺរ៉ុបកាលពីសប្តាហ៍មុនដើម្បីបញ្ចុះបញ្ចូលនិងទប់ស្កាត់វិធានការដកប្រព័ន្ធអនុគ្រោះពន្ធ«គ្រប់មុខទំនិញលើកលែងគ្រឿងសព្វាវុធ»ពីប្រទេសកម្ពុជា។
យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចេញនៅថ្ងៃព្រហស្បតិ៍នេះឲ្យដឹងថា បេសកកម្មពិសេសនេះដឹកនាំដោយលោក សុក ស៊ីផាន់ណា ទីប្រឹក្សារាជរដ្ឋាភិបាល។ តាមសេចក្តីប្រកាសព័ត៌មានដដែលបញ្ជាក់ថា បេសកកម្មនេះចាប់ផ្តើមពីថ្ងៃទី១៨ ខែមិថុនា ដល់ថ្ងៃទី១ ខែកក្កដា ឆ្នាំ២០១៨។ សេចក្តីប្រកាសព័ត៌មានបញ្ជាក់ដែរថា បេសកកម្មពិសេសនឹងបំភ្លឺជូនមន្រ្តីជាន់ខ្ពស់សំខាន់ៗរបស់គណៈកម្មការអឺរ៉ុប ប្រធានគណៈកម្មាធិការកិច្ចការបរទេសរបស់សភាអឺរ៉ុប និងឥស្សរជនសំខាន់ៗផ្សេងទៀត។
ក្នុងសេចក្តីថ្លែងការណ៍របស់ក្រសួងការបរទេសបញ្ជាក់ថា តាមរយៈការបញ្ជូនបេសកកម្មនេះ កម្ពុជាក៏ចង់បង្ហាញនូវសុឆន្ទៈក្នុងការសន្ទនាត្រង់ទៅត្រង់មក ដោយកម្ពុជាចាត់ទុកសហភាពអឺរ៉ុបគឺជាដៃគូដ៏សំខាន់ដែលមានកិច្ចសហប្រតិបត្តិការយ៉ាងរឹងមាំជាមួយកម្ពុជា។
សភាអឺរ៉ុប បានប្រាប់ទៅគណៈកម្មការអឺរ៉ុប ឲ្យសើរើការផ្ដល់ភាពអនុគ្រោះផ្នែកពន្ធគយសម្រាប់ប្រទេសកម្ពុជា ជាការឆ្លើយតបទៅនឹងការរំលាយគណបក្សប្រឆាំងក្នុងប្រទេសនេះ។
តាមរបាយការណ៍របស់គណកម្មការអឺរ៉ុបដែលចេញផ្សាយកាលពីខែមេសាកន្លងទៅ ប្រទេសកម្ពុជាបាននាំចេញទំនិញទៅសហគមន៍អឺរ៉ុបក្នុងឆ្នាំ២០១៧មានទំហំជាសាច់ប្រាក់ជាង៥ពាន់លានដុល្លា។ ទំនិញដែលកម្ពុជានាំចេញទៅសហគមន៍អឺរ៉ុបភាគច្រើនគឺផលិតផលវាយនភណ្ឌនិងកសិកម្ម៕