យោងតាមរបាយការពីនាយកដ្ឋានចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ បានឲ្យដឹងថាមនុស្ស៨នាក់បានស្លាប់ដោយគ្រោះថ្នាក់ចរាចរណ៍ក្នុងពេលតែមួយថ្ងៃកាលពីថ្ងៃពុធម្សិលមិញ។ របាយការណ៍ដដែលបញ្ជាក់ថាមនុស្ស១៥នាក់ទៀតបានរងរបួសធ្ងន់និងស្រាល។
យោងតាមគេហទំព័ររបស់អគ្គស្នងការដ្ឋាននគរបាលជាតិឲ្យដឹងថា គ្រោះថ្នាក់ចរាចរណ៍បានសម្លាប់ជីវិតមនុស្ស១១៥នាក់ និងរបួសធ្ងន់និងស្រួលចំនួន៣៤៩នាក់ក្នុងរយៈពេល២៧ថ្ងៃក្នុងខែមិថុនានេះ។
លោក ហ៊ឹម យ៉ាន អគ្គស្នងការរងនៃអគ្គស្នងការដ្ឋាននគរបាលជាតិថ្លែងក្នុងសន្និសិទសារព័ត៌មានកាលពីថ្ងៃព្រហស្បតិ៍សប្តាហ៍មុនថា អ្នកស្លាប់ដោយគ្រោះថ្នាក់ចរាចរណ៍ក្នុងរយៈពេល៥ខែដើមឆ្នាំ២០១៨ គឺនៅតែមានចំនួនខ្ពស់ដដែលបើប្រៀបធៀបនឹងរបាយការណ៍៥ខែដើមឆ្នាំ២០១៧។ បើតាមលោក ហ៊ឹម យ៉ាន ចំនួនអ្នកស្លាប់គឺថយចុះតែម្នាក់គត់ ខណៈអ្នករបួសថយចុះចំនួន៥៦០នាក់៕