សហគមន៍អន្តរជាតិបានបន្តរិះគន់កម្ពុជាពីបញ្ហាសិទ្ធិមនុស្សទៅកាន់ ក្រុមប្រឹក្សាសិទ្ធិមនុស្សនៃអង្គការសហប្រជាជាតិ ដើម្បីឲ្យមានវិធានការណ៍ចំពោះរដ្ឋាភិបាលកម្ពុជាឲ្យបានមុនការបោះឆ្នោតនាពេលខាងមុខ។
ក្រុមប្រឹក្សាសិទ្ធិមនុស្សនៃអង្គការសហប្រជាជាតិបានបើកកិច្ចប្រជុំលើកទី៣៨ ចាប់ពីថ្ងៃទី១៨ មិថុនា ដល់ថ្ងៃទី ៦ កក្កដា ដើម្បីធ្វើការពិភាក្សាលើបញ្ហាសិទ្ធិមនុស្សសកលដើម្បីដាក់ជូនអង្គការនេះធ្វើសេចក្តីសម្រេចនាពេលខាងមុខ។
ក្នុងកិច្ចប្រជុំកាលពីថ្ងៃទី២៧ មិថុនា មានប្រទេស និងអង្គការអន្តរជាតិយ៉ាងហោចណាស់៨ បានរិះគន់ដោយប្រយោល និងចំៗមកលើរដ្ឋាភិបាលកម្ពុជាដែលពួកគេថាកំពុងរំលោភសិទ្ធិមនុស្ស និងធ្វើឲ្យការបោះឆ្នោតនាពេលខាងមុខមិនអាចទទួលយកបាន ដោយទាមទារឲ្យកម្ពុជាងាកមកកាន់ការបោះឆ្នោតដែលសេរីត្រឹមត្រូវ និងយុត្តិធម៌ដោយដោះលែងលោកកឹម សុខា និងអ្នកទោសមនសិការផ្សេងទៀត អនុញ្ញាតឲ្យបក្សសង្គ្រោះជាតិ អាចបង្កើតឡើងវិញ និងចូលរួមការបោះឆ្នោតនាពេលខាងមុខ។
ប្រទេសនិងអង្គការទាំងនោះរួមមានប្រទេសប៊ុលការី ប៊ែលហ្ស៊ិក ហ្វាំងឡង់ អៀកឡង់ អង្គការHuman Right Watch សហព័ន្ធអន្តរជាតិសម្រាប់សិទ្ធិមនុស្ស អង្គការHuman Right now និងគណកម្មការច្បាប់អន្តរជាតិ ICJ ។
តំណាងប្រទេសប៊ែលហ្ស៊ិកលោក Geert Muylle បានថ្លែងថាប្រទេសលោកមានការបារម្ភចំពោះការបោះឆ្នោតនាពេលខាងមុខនៅកម្ពុជា ដោយស្នើឲ្យអាជ្ញាធរកម្ពុជាធ្វើយ៉ាងណាឲ្យការបោះឆ្នោតនាពេលខាងមុខមានភាពសេរីត្រឹមត្រូវ និងយុត្តិធម៌។
លោកថា៖ « ប៊ែលហ្ស៊ិក ចង់ឲ្យរដ្ឋាភិបាលកម្ពុជា ក្នុងការអនុញ្ញាតឲ្យបក្សប្រឆាំងអាចបង្កើតឡើងវិញបាន និងត្រូវដោះលែងអ្នកទោសនយោបាយទាំងអស់ » ។
តំណាងរបស់អង្គការHuman Right now លោក Nicolas Torres Vieira បានថ្លែងថា ការធ្វើទុក្ខបុកម្នេញរបស់រដ្ឋាភិបាលកម្ពុជាប្រឆាំងបក្សប្រឆាំង អ្នកកាសែត និងសង្គមស៊ីវិល វាបានធ្វើឲ្យប្រាកដណាស់ថាការបោះឆ្នោតនាពេលខាងមុខនោះនឹងមិនសេរី និងយុត្តិធម៌នោះទេ ដែលធ្វើឲ្យប៉ះពាល់ដល់ច្បាប់សិទ្ធិមនុស្សអន្តរជាតិ និងកិច្ចព្រមព្រៀងសន្តិភាពទីក្រុងប៉ារីស។
តំណាងរបស់អង្គការHuman Right now លោក Nicolas Torres Vieira
នៅថ្ងៃនោះដែរគណៈកម្មការច្បាប់អន្តរជាតិ ICJ បានថ្លែងដោយជំរុញទៅកាន់ ក្រុមប្រឹក្សា និងសមាជិក ត្រូវតែឆ្លើយតបឱ្យកាន់តែមានប្រសិទ្ធិភាពចំពោះវិបត្តិដែលកំពុងបន្តនៅកម្ពុជា ជាពិសេសនៅប៉ុន្មានសប្តាហ៍មុនពេលបោះឆ្នោត។
តំណាងICJ ថ្លែងថា៖ « រដ្ឋមួយធ្វើការ ផ្លាស់ប្តូរយ៉ាងឆាប់រហ័សទៅកាន់របបផ្តាច់ការជាមួយនឹងការបង្ក្រាបយ៉ាងទូលំទូលាយ និងកាន់តែស៊ីជម្រៅទៅលើសិទ្ធិមនុស្ស ហើយសង្គមស៊ីវិលមិនអាចនិយាយដោយបើកចំហនៅក្រុមប្រឹក្សានេះដោយសារការភ័យខ្លាចពីការសងសឹក គួរតែត្រូវបានគេពិភាក្សា ដូចស្ថានការណ៍ដែលតម្រូវ ឱ្យមានការយកចិត្តទុកដាក់ របស់ក្រុមប្រឹក្សា ក្រោមមាត្រា ៤ បញ្ហាជំនួយបច្ចេកទេសនិងការកសាងសមត្ថភាពនៅចំណុចទី១០ ។ ឧទាហរណ៏បន្ទាន់មួយគឺប្រទេសកម្ពុជា! »
ភ្លាមៗបន្ទាប់ពីមានការរិះគន់ តំណាងបេសកកម្មការទូតកម្ពុជាប្រចាំអង្គការសហប្រជាជាតិលោក ណៃ សំអុល បានធ្វើការវាយបកទៅវិញផងដែរដោយបានចោទប្រទេស និងអង្គការទាំងនោះថាបានធ្វើសេចក្តីថ្លែងការណ៍មិនត្រឹមត្រូវតាមពេលវេលា និងប្រើប្រាស់ក្រុមប្រឹក្សាសិទ្ធិមនុស្សជាឧបករណ៍ជ្រៀតជ្រែកនយោបាយ បង្ខូចកេរ្តិ៍ឈ្មោះកម្ពុជា។
តំណាងបេសកកម្មការទូតកម្ពុជាប្រចាំអង្គការសហប្រជាជាតិលោក ណៃ សំអុល
លោកណៃ សំអុលបានបញ្ជាក់ថាការស្នើឲ្យរដ្ឋាភិបាលកម្ពុជាសង្គ្រោះគណបក្សសង្គ្រោះជាតិ ឬដោះលែងជនឃុំខ្លួន គឺកំពុងរុញឲ្យរដ្ឋាភិបាលឲ្យជ្រៀតជ្រែកអំណាចតុលាការដែលជាអំណាចឯករាជ្យ។
ខណៈដែលគណបក្សសង្គ្រោះជាតិត្រូវបានគេផាត់ចេញពីការបោះឆ្នោតនាពេលខាងមុខនោះ បានធ្វើឲ្យអ្នកឃ្លាំមើលយល់ថាការបោះឆ្នោតនាពេលខាងមុខមិនអាចឆ្លុះបញ្ចាំងពីគោលការណ៍ប្រជាធិបតេយ្យបាននោះទេ។
មន្ត្រីជាន់ខ្ពស់ផ្នែកអង្កេតនៃអង្គការខុមហ្វ្រែលលោក កន សាវាង្ស បានថ្លែងប្រាប់វីអូឌីកាលពីថ្ងៃទី៥ មិថុនាថា រដ្ឋាភិបាលកើតក្រោយការបោះឆ្នោតបែបបនេះ នឹងជួបបញ្ហាជាច្រើន ដូចជា ប្រតិកម្មរិះគន់ពីសហគមន៍អន្ដរជាតិ និងការមិនទទួលស្គាល់លទ្ធផលបោះឆ្នោតជាដើម៕
