អ្នកនាំពាក្យក្រសួងការពារជាតិលោក ឈុំ សុជាតិ បានឲ្យដឹងថានៅព្រឹកនេះរដ្ឋាភិបាលបានប្រកាសផ្ទេរតំណែងស្ដីទី នៃអគ្គមេបញ្ជាការកងទ័ព សេនាធិការចម្រុះ និង មេបញ្ជាការកងទ័ពឲ្យលោក សៅ សុខា និង លោក ហ៊ុនម៉ាណែតជាផ្លូវការហើយ ។
បើតាមលោក ឈុំ សុជាតិបានឲ្យដឹងថាការប្រកាសផ្ទេរតំណែងស្តីទីនេះប្រព្រឹត្តិទៅនាព្រឹកថ្ងៃទី ៣០ ខែ មិថុនា នេះនៅទីស្ដីការក្រសួង ក្រោមអធិបតីភាពរបស់លោក ទៀ បាញ់ រដ្ឋមន្រ្តីក្រសួងការពារជាតិ។
រដ្ឋាភិបាលបានប្រកាសផ្ទេរតំណែងអគ្គមេបញ្ជាការស្តីទី នៃកងយោធពលខេមរភូមិន្ទ ឲ្យទៅលោក សៅ សុខា អគ្គមេបញ្ជាការរង នៃខ.ភ.មទៅលោកហ៊ុន ម៉ាណែត។ ក្នុងពិធីព្រឹកនេះក៏បានបញ្ជាក់ថា លោក ហ៊ុន ម៉ាណែត ទទួលតំណែងពីរទៀត គឺ ជានាយសេនាធិការចម្រុះស្តីទី នៃខ.ភ.ម និងមេបញ្ជាការស្តីទី នៃបញ្ជាការដ្ឋានកងទ័ពជើងគោក ។
បើតាមលោក ឈុំ សុជាតិ បានឲ្យដឹងថាការផ្ទេរតំណែងស្ដីទីទាំងនោះ គឺជាការផ្ទេរការទទួលខុសត្រូវបណ្ដោះអាសន្ន ក្នុងពេលដែលលោក ប៉ុល សារឿន អគ្គមេបញ្ជាការ នៃខ.ភ.ម លោក គន់ គីម នាយសេនាធិការចម្រុះ នៃខ.ភ.ម និង លោក មាស សុភា មេបញ្ជាការកងទ័ពជើងគោក ជាប់ភារកិច្ចកឈរឈ្មោះជាតំណាងរាស្រ្ត សម្រាប់ការបោះឆ្នោតជាតិខាងមុខ៕
