លោកនាយករដ្ឋមន្ត្រី ហ៊ុន សែន បានប្រកាសលើកកម្ពស់កិច្ចសហប្រតិបត្តិការជាដៃគូរគ្រប់ជ្រុងជ្រោយជាមួយប្រទេសចិនបន្ថែមទៀត ដោយថា ដើម្បីផ្តល់ផលប្រយោជន៍ដល់ប្រជាពលរដ្ឋកម្ពុជា។
លោក ហ៊ុន សែន បានថ្លែងបែបនេះក្នុងពិធីអបអរសាទរខួប ៦០ឆ្នាំនៃទំនាក់ទំនងកម្ពុជា-ចិន ដែលត្រូវបានរៀបចំធ្វើឡើងនៅរាជធានីភ្នំពេញកាលពីល្ងាចថ្ងៃម្សិលមិញនេះ។
ក្នុងពិធីនោះ លោក ហ៊ុន សែន បានសង្កត់ធ្ងន់ថា ក្នុងយៈពេល ៦០ឆ្នាំមកនេះ ប្រទេសកម្ពុជាបានទទួលប្រយោជន៍ជាច្រើនពីទំនាក់ទំនងជាមួយប្រទេសចិន ហើយក៏នឹងបន្តគាំទ្រការរឹតចំណងជាមួយប្រទេសចិនបន្ថែមទៀតផងដែរ។
លោកបន្ថែមថា គំនិតផ្តួចផ្តើមរបស់ចិនលើគោលនយោបាយ «ខ្សែក្រវ៉ាត់មួយ និងផ្លូវមួយ» «មូលនិធិផ្លូវសូត្រ» និងធនាគារវិនិយោគហេដ្ឋារចនាសម្ព័ន្ធអាស៊ី គឺជាការធ្វើឲ្យប្រទេសដែលនៅតាមខ្សែក្រវ៉ាត់ទាំងនោះមានការអភិវឌ្ឍ និងពង្រឹងភាពជាដៃគូរ ដែលកម្ពុជាប្រកាសគាំទ្រពេញទំហឹងចំពោះគំនិតមួយនេះ។
លោកនាយករដ្ឋមន្ត្រី ហ៊ុន សែន
គិតត្រឹមឆ្នាំ២០១៧ ទំហំពាណិជ្ជកម្មទេ្វភាគីកម្ពុជា-ចិន បានកើនឡើងដល់ទំហំ ៥ ៥៧៧លានដុល្លាអាមេរិក ដែលធ្វើឲ្យប្រទេសចិនឈរនៅលំដាប់ទី១ ក្នុងចំណោមប្រទេសវិនិយោគផ្ទាល់មកកាន់កម្ពុជា ខណៈដែលប្រទេសទាំងពីររំពឹងថា ទំហំពាណិជ្ចកម្មនេះ នឹងកើនឡើងដល់ ៦០០០លានដុល្លារអាមេរិក នៅឆ្នាំ២០២០ខាងមុខ។
ខណៈដែលកម្ពុជាមានទំនាក់ទំនងកាន់តែជិតស្និទជាមួយចិននោះ ប្រទេសនេះត្រូវបានមើលឃើញថា ហាក់មានទំនាក់ទំនងរកាំរកូសជាមួយសហរដ្ឋអាមេរិក និងបណ្ដាប្រទេសលោកសេរី។
អ្នកតាមដានបញ្ហានយោបាយកម្ពុជា លោក ឯម សុវណ្ណារ៉ា បានទទួលស្គាល់ថា កម្ពុជាពិតជាទាញបានប្រយោជន៍ច្រើននៅក្នុងទំនាក់ទំនងដ៏ល្អជាមួយចិន ប៉ុន្តែ លោកថា រដ្ឋាភិបាលក៏មិនគួរបោះបង់អាមេរិក ឬសហភាពអឺរ៉ុបចោលនោះឡើយ។
អ្នកតាមដានបញ្ហានយោបាយកម្ពុជា លោក ឯម សុវណ្ណារ៉ា
ទំនាក់ទំនងសម័យទំនើបរវាងកម្ពុជា-ចិន បានចាប់ផ្តើមនៅថ្ងៃទី១៩ កក្កដា ឆ្នាំ១៩៥៨ បន្ទាប់ពីកម្ពុជាបានទទួលស្គាល់សាធារណរដ្ឋប្រជាមានិតចិនជាប្រទេសស្របច្បាប់ និងបានបដិសេធឯករាជ្យភាពរបស់តៃវ៉ាន់។
ទំនាក់ទំនងរវាងប្រទេសទាំងពីរនេះ បានបន្សល់ទុកនូវប្រវត្តិសាស្ត្រផ្អែមល្ហែមផង និងជូរចត់ផងនៅក្នុងរយៈពេល ៦០ឆ្នាំកន្លងមក៕
