រដ្ឋាភិបាលបានសម្រេចបង្កើតគម្រោងផ្ដល់ប្រាក់កម្ចីដល់សិស្សនិស្សិតក្នុងឧស្សាហកម្មទេសចរណ៍។ នេះបើតាមសេចក្ដីប្រកាសព័ត៌មានរបស់ក្រសួងទេសចរណ៍កាលពីថ្ងៃម្សិលមិញនេះ។
ក្រសួងបានលើកឡើងផងដែរថា គម្រោងនេះចូលរួមដោយធនាគារ និងគ្រឹះស្ថានមីក្រូហិរញ្ញវត្ថុចំនួន ៦ ហើយរដ្ឋាភិបាលគ្រោងផ្ដល់កម្ចីជាមួយអត្រាការប្រាក់ទាបទៅដល់សិស្សនិស្សិត។
ក្រសួងបានឲ្យដឹងបន្ថែមថា សិស្សនិស្សិតអាចស្នើសុំកម្ចីមានរយៈពេលដល់ទៅ ៧ឆ្នាំ និងអាចសងត្រឡប់ទៅវិញទាំងអំឡុងពេលសិក្សា ឬក្រោយបញ្ចប់ការសិក្សា។
ក្រសូងបានបញ្ជាក់ដែរថា ធនាគារ និងគ្រឹះស្ថានមីក្រូហិរញ្ញវត្ថុដែលផ្តល់សេវាកម្ចីដល់និស្សិតនេះ កំពុងតែរៀបចំគោលនយោបាយកម្ចីផ្សេងទៀតសម្រាប់និស្សិតមុខជំនាញផ្សេងៗផងដែរ៕
