ក្រសួងធនធានទឹក និងឧតុនិយម បានព្រមានទៅដល់ប្រជាពលរដ្ឋនៅតាមមាត់សមុទ្រ និងប្រជានេសាទ ឲ្យបម្រុងប្រយ័ត្នខ្ពស់ចំពោះខ្យល់បក់បោកខ្លាំង និងភ្លៀងធ្លាក់ ចាប់ពីថ្ងៃនេះរហូតដល់សប្ដាហ៍ក្រោយ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងធនធានទឹក និងឧតុនិយម បានឲ្យដឹងថា ខេត្តនានានៅតាមមាត់សមុទ្រ នឹងមានភ្លៀងធ្លាក់ច្រើនជាបន្តបន្ទាប់ ហើយផ្ទៃសមុទ្រមានខ្យល់បក់បោកខ្លាំង និងមានរលកខ្ពស់ ចាប់ពីថ្ងៃទី១២ ដល់ថ្ងៃទី១៨ ខែកក្កដានេះ។
បើតាមសេចក្ដីប្រកាសព័ត៌មានដដែលនេះ បរិមាណទឹកភ្លៀងនឹងថមថយនៅតាមខេត្តមួយចំនួន រួមមានរាជធានីភ្នំពេញ ខេត្តកណ្តាល កំពង់ស្ពឺ និងតាកែវ ខណៈដែលខេត្តផ្សេងៗទៀត នឹងមានភ្លៀងធ្លាក់រាយប៉ាយក្នុងកម្រិតមធ្យមទៅច្រើន។
ក្រសួងបានអោយដឹងដែរថា ធាតុអាកាសបែបនេះបង្កឡើងដោយឥទ្ធិពលខ្យល់មូសុងនិរតីបក់មកលើតំបន់ឆ្នេរ និងប្រព័ន្ធសម្ពាធទាបដែលបាននិងកំពុងអូសបន្លាយកាត់លើអាងទន្លេមេគង្គ ក្នុងប្រទេសឡាវ៕
