បន្ទាប់ពីកម្ពុជា ថៃបិទបញ្ចប់យុទ្ធនាការផ្តល់ភាពស្របច្បាប់ដល់ពលករខ្មែរកាលពីដើមខែនេះរួចមក ប្រទេសថៃចាប់បញ្ជូនពលករខ្មែរខុសច្បាប់មកវិញជាហូរហែរ។
កម្ពុជា និង ថៃ បានឯកភាពរួមគ្នាកាលពីខែមុនដោយសម្រេចបិទបញ្ចប់យុទ្ធនាការ ផ្តល់ភាពស្របច្បាប់ដល់ពលករខ្មែរដែលធ្វើការខុសច្បាប់នៅប្រទេសថៃនៅត្រឹមថ្ងៃទី១ កក្កដា ដោយអះអាងថាមានពលករខុសច្បាប់នៅសេសសល់ក្នុងប្រទេសថៃតិចតួចប៉ុណ្ណោះ។
នាយប៉ុស្តិ៍នគរបាលអន្តោប្រវេសន៍ច្រកទ្វាអន្តរជាតិប៉ោយប៉ែតលោក ស៊ឹម សំអាត បានឲ្យVOD ដឹងកាលពីម្សិលមិញថាចំនួននៃការចាប់បញ្ជូនពលករខ្មែរមកវិញពីសំណាក់អាជ្ញាធរថៃក្នុងមួយថ្ងៃៗជាមធ្យមមានចន្លោះពី៥០ ទៅ៦០នាក់។ លោកបន្ថែមថា ពលករដែលចាប់បញ្ជូនទាំងនោះភាគច្រើនជាពលករដែលបានចំណាកស្រុកខុសច្បាប់ លើសប័ណ្ណការងារ និងដើរហើរលើសការហាមឃាត់របស់អាជ្ញាធរយោធាថៃ។
នាយប៉ុស្តិ៍នគរបាលអន្តោប្រវេសន៍ច្រកទ្វាអន្តរជាតិប៉ោយប៉ែតលោក ស៊ឹម សំអាត
អ្នកនាំពាក្យក្រសួងការងារលោក ហេង សួរ កាលពីថ្ងៃទី៤ កក្កដា បានអះអាងប្រាប់ VOD តាមប្រព័ន្ធទំនាក់ទំនងសង្គមWhatsapp ថា១០០ភាគរយនៃពលករដែលមានប័ណ្ណស៊ីជម្ពូរត្រូវបានភាគីទាំងពីរឯកភាពផ្តល់ភាពស្របច្បាប់បានទាំងស្រុងរួចហើយ ខណៈដែលអ្នកចូលដីថៃក្រោយ ខែកញ្ញា ឆ្នាំ២០១៧ ប្រទេសថៃស្នើឲ្យត្រលប់មកកម្ពុជាសិន រួចដាក់ពាក្យសុំទិដ្ឋាការការងារនៅស្ថានទូតថៃនៅភ្នំពេញជាមុនសិនមុននឹងអនុញ្ញាតឲ្យចូលប្រទេសថៃធ្វើការវិញ។
អ្នកនាំពាក្យក្រសួងការងារលោក ហេង សួរ
កាលពីថ្ងៃទី១២ កក្កដា ស្ថានទូតកម្ពុជាប្រចាំប្រទេសថៃបានចេញសេចក្តីប្រកាសព័ត៌មានមួយ ជំរុញឲ្យពលករខ្មែរដែលពុំមានឯកសារសម្រាប់ស្នាក់នៅ និងធ្វើការនៅក្នុងប្រទេសថៃ ឲ្យប្រញាប់រួសរាន់ទៅទំនាក់ទំនងស្ថានទូត ដើម្បីដាក់ពាក្យស្នើសុំលិខិតធ្វើដំណើរបណ្តោះអាសន្ន ត្រលប់មកកម្ពុជាដើម្បីរៀបចំឯកសារស្របច្បាប់ និងចូលទៅធ្វើការក្នុងប្រទេសថៃវិញផងដែរ។
នាយកមជ្ឈមណ្ឌលសម្ព័ន្ធភាពការងារនិងសិទ្ធិមនុស្សលោក មឿន តុលា មានប្រសាសន៍ថាមានបញ្ហាដែលធ្វើឲ្យនៅតែមានពលករចំណាកស្រុកខុសច្បាប់នេះគឺ ដោយសារតែចំណេះដឹងរបស់ពលរដ្ឋទៅលើការទៅធ្វើការងារនៅក្រៅប្រទេសនៅមានកម្រិត ពលរដ្ឋមិនទុកចិត្តក្រុមហ៊ុននាំពលករទៅធ្វើការនៅថៃ និតិវិធីស្មុគស្មាញរបស់កម្ពុជាក្នុងការចេញលិខិតស្របច្បាប់ដល់ពលករ និងការស្ទាក់ស្ទើររបស់ថៅកែថៃ ក្នុងការបញ្ជូនកម្មករខ្លួនទៅទទួលភាពស្របច្បាប់។
នាយកមជ្ឈមណ្ឌលសម្ព័ន្ធភាពការងារនិងសិទ្ធិមនុស្សលោក មឿន តុលា
តាមការបញ្ជាក់របស់ក្រសួងការងារពលករចំណាកស្រុកជាង ១លាន៨ម៉ឺននាក់ ត្រូវបានរាជរដ្ឋាភិបាលកម្ពុជា និងថៃ បានបញ្ជាក់ភាពស្របច្បាប់រួចរាល់អស់ហើយ មុនការបញ្ចប់យុទ្ធនាការផ្តល់ភាពស្របច្បាប់ដល់ពលករខ្មែរដែលធ្វើការនៅប្រទេសថៃនាដើមខែកក្កដានេះ។
គួរបញ្ជាក់ផងដែរថា យុទ្ធនាការផ្តល់ភាពស្របច្បាប់ដល់ពលករខ្មែរនេះត្រូវបានបង្កើតឡើងកាលពីខែកក្កដាឆ្នាំមុន បន្ទាប់ពីរដ្ឋាភិបាលយោធាថៃ ចាប់បញ្ជូនពលករខ្មែរដែលទៅធ្វើការខុសច្បាប់យ៉ាងច្រើនគំហុកឲ្យត្រលប់មកកម្ពុជាវិញ៕