ប្រជាសហគមន៍ជនជាតិទំពួនក្នុងស្រុកលំផាត់ ខេត្តរតនៈគីរី បានចោទអាជ្ញាធរស្រុកថាបានចុះមកណែនាំឲ្យសហគមន៍ ឈប់ទាក់ទងជាមួយអង្គការក្រៅរដ្ឋាភិបាលរហូតដល់បោះឆ្នោតរួច។
ប្រធានសហគមន៍ទំពួនក្នុងស្រុកលំផាត់ ខេត្តរតនៈគីរី លោក ទុយ ញ៉េប បានឲ្យVOD ដឹងថា អភិបាលស្រុកលំផាត់លោកនូ ថេរ កាលពីម្សិលមិញបានចុះមកបើកវេទិការដើម្បីណែនាំពលរដ្ឋពីការបោះឆ្នោតខាងមុខក្នុង ភូមិសាមបុត្រលើ ឃុំសេដា ដោយបញ្ជាក់ប្រាប់ទៅកាន់ប្រជាសហគមន៍មិនឲ្យទាក់ទង ឬជួបជុំ ជាមួយអង្គការសង្គមស៊ីវិលចាប់ពីពេលនេះរហូតដល់បញ្ចប់ការបោះឆ្នោតថ្ងៃទី២៩ កក្កដាខាងមុខ ដោយពុំបានបញ្ជាក់ពីមូលហេតុនោះទេ។
ប្រធានសហគមន៍ទំពួនក្នុងស្រុកលំផាត់ ខេត្តរតនៈគីរី លោក ទុយ ញ៉េប
លោកទុយ ញ៉េប យល់ថាការរារាំងពលរដ្ឋមិនឲ្យមានទំនាក់ទំនងជាមួយអង្គការសង្គមស៊ីវិលនេះ គឺជាការរារាំងដល់សិទ្ធិរបស់ពលរដ្ឋ និងអនុវត្តន៍ផ្ទុយពីច្បាប់។
អភិបាលស្រុកលំផាត់លោកនូ ថេរ បានបញ្ជាប់ប្រាប់VODថា ពលរដ្ឋអាចទាក់ទង ឬជួបជុំជាមួយអង្គការក្រៅរដ្ឋាភិបាលលុះត្រាតែអង្គការនោះបានការអនុញ្ញាតពីថ្នាក់ខេត្តជាមុនសិន។
អភិបាលស្រុកលំផាត់លោកនូ ថេរ
អ្នកសម្របសម្រួលសមាគមន៍អាហុកប្រចាំខេត្តរតនៈគីរីលោក ឌិន ខន្នី មានប្រសាសន៍ថាពលរដ្ឋមានសិទ្ធិសេរីភាពក្នុងការជួបជុំ ឬធ្វើការដើម្បីចូលរួមក្នុងកិច្ចការសង្គមផ្សេងៗ។ លោកយល់ថាការរារាំងពលរដ្ឋមិនឲ្យជួបជុំ ឬទាក់ទងជាមួយអង្គការសង្គមស៊ីវិលនេះជាការរំលោភដល់សេរីភាពក្នុងការជួបជុំរបស់ប្រជាពលរដ្ឋដែលត្រូវបានការពារដោយច្បាប់។
អ្នកសម្របសម្រួលសមាគមន៍អាហុកប្រចាំខេត្តរតនៈគីរីលោក ឌិន ខន្នី
បើតាមលោក ឌិន ខន្នី បើទោះបីជាមានការណែនាំពីរដ្ឋបាលថ្នាក់ជាតិយ៉ាងណាក៏ដោយក៏អាជ្ញាធរថ្នាក់មូលដ្ឋានហាក់មិនបានអនុវត្តន៍បានត្រឹមត្រូវតាមការណែនាំទាំងនោះឡើយ ដែលធ្វើឲ្យលំហសង្គមស៊ីវិលហាក់កាន់តែរួមតូចនៅរយៈពេលចុងក្រោយនេះ។
កាលពីថ្ងៃទី២១ មិថុនា រដ្ឋមន្ត្រីក្រសួងមហាផ្ទៃលោក ស ខេង បានអំពាវនាវទៅអង្គការសង្គមស៊ីវិល និងអាជ្ញាធរ ឲ្យសហការគ្នាឡើងវិញ បន្ទាប់ពីលោកមើលឃើញថា មួយរយៈចុងក្រោយនេះ អាជ្ញាធរ និងអង្គការសង្គមស៊ីវិល ហាក់បានសាចទឹកដាក់គ្នាជុំវិញកិច្ចសហការជំរុញការអភិវឌ្ឍបែបប្រជាធិបតេយ្យ។
លោក ស ខេង បញ្ជាក់ថា សមាគមនៅថ្នាក់មូលដ្ឋាន អាចធ្វើសកម្មភាពបាន ដោយមិនតម្រូវឲ្យពួកគេមកចុះបញ្ជីនៅក្រសួងមហាផ្ទៃទេ ហើយថា រាល់ការធ្វើសកម្មភាព របស់សមាគម ឬអង្គការ ក៏មិនតម្រូវឲ្យសុំច្បាប់ដែរ ដោយថា គ្រាន់តែជូនដំណឹង ៣ថ្ងៃមុនប៉ុណ្ណោះ៕
