អាជ្ញារខេត្តស្ទឹងត្រែងបានអំពាវនាវឲ្យពលរដ្ឋដែលរស់នៅខេត្តនេះ ប្រុងប្រយ័ត្ននិងត្រៀមបង្ការខ្ពស់បំផុតករណីមានទឹកជំនន់កើនខ្លាំង ក្រោយបាក់ទំនប់វារីអគ្គីសនីនៅឡាវ។
យោងតាមសេចក្តីជូនដំណឹងរបស់រដ្ឋបាលខេត្តស្ទឹងត្រែងចេញផ្សាយនៅថ្ងៃនេះដែលវីអូឌីទើបទទួលបាន ការអំពាវនាវនេះធ្វើឡើងបន្ទាប់ពីទំបន់វារីអគ្គិសនីសេពានសេណាមណយ របស់ឡាវបានបាក់ ដែលបណ្ដាលឲ្យទឹកនៅក្នុងទំនប់នោះហូរចូលទន្លេសេកុង រួចបន្តហូរចុះក្រោមបន្តមកទន្លេសេសាន ស្រែពក និងទន្លមេគង្គក្នុងល្បឿនយ៉ាងលឿន។
អាជ្ញាធរខេត្តនេះបានអំពាវនាវឲ្យប្រជាពលរដ្ឋទាំងអស់នៅខេត្តស្ទឹងត្រែងដែលរស់នៅក្បែរទន្លេនិងតាមដងទន្លេសេកុង ក៏ដូចជាទន្លេនានាក្នុងខេត្តនេះ ជាពិសេសអ្នកដែលរស់នៅឃុំ និងសង្កាត់ទាំងអស់នៃស្រុកសៀមប៉ាង ស្រុកសេសាន ក្រុងស្ទឹងត្រែង ស្រុកថាឡាបរីវ៉ាត់ និងស្រុកសៀមបូកមានការប្រុងប្រយ័ត្ននិងបង្ការខ្ពស់បំផុត ហើយត្រូវផ្ដល់ព័ត៌មានដល់អាជ្ញាធរមូលដ្ឋានឲ្យបានលឿនបំផុតករណីទឹកជំនន់ឡើងខ្លាំង។
តាមសេចក្តីប្រកាសព័ត៌មានរបស់ក្រសួងធនធានទឹកនិងឧតុនិយមដែលចេញនៅថ្ងៃទី២៤ខែកក្កដានេះដែរ ទំនប់វារីអគ្គិសនីសេពានសេណាមណយស្ថិតនៅចំងាយប្រមាណជា៧០គីឡូម៉ែត្រពីព្រំដែនកម្ពុជា-ឡាវ ហើយមានសមត្ថភាពស្តុកទឹកបាន៥ពាន់លានម៉ែត្រគូប។
