កងរាជអាវុធហត្ថជាង១ពាន់នាក់ ត្រូវបានចល័តពីដែនសមុទ្ររាម ខេត្តព្រះសីហនុ ចូលមូលដ្ឋានរាជធានីភ្នំពេញដើម្បីត្រៀមបែងចែកទៅកាន់គោលដៅក្នុងខេត្តកំពង់ស្ពឺ តៀមសម្រួលដល់ការបោះឆ្នោត។ នេះបើតាមការបញ្ជាក់របស់អគ្គមេបញ្ជាការកងទ័ព លោក សៅ សុខា។
លោក សៅ សុខា បានបញ្ជាក់ប្រាប់ VOD នៅរសៀលនេះថា ការចល័តទ័ពនេះ គឺគ្រាន់តែជាការបញ្ជូនកម្លាំងត្រឡប់ពីការហ្វឹកហាត់ពិសេសនៅដែនសមុទ្ររាម ដើម្បីពិនិត្យសម្ភារ មុននឹងបញ្ជូនទៅការពារការបោះឆ្នោតនៅខេត្តកំពង់ស្ពឺ ដោយលោកថា ខេត្តនេះខ្វះកងកម្លាំងការពារ។
លោកមានប្រសាសន៍បន្តថា៖ «ដល់ឥឡូវហ្នឹង គឺត្រូវត្រឡប់ចូលមកកាន់អង្គភាពវិញ ដើម្បីប្រមូលរៀបចំត្រៀម ពិនិត្យមើលខោអាវ ស្បៀងអាហារ ដើម្បីទៅការពារថ្ងៃបោះឆ្នោត ចាប់ពីថ្ងៃទី២៨ទៅ គេចូលទៅកាន់គោលដៅហើយ ព្រោះថ្ងៃទី២៩ [កក្កដា] គេបោះឆ្នោតហើយហ្នឹង»។
រថយន្តដឹកកងកម្លាំងជាច្រើនគ្រឿងទាំងនោះ ធ្វើដំណើរតាមផ្លូវជាតិលេខ៤ គោលដៅចូលរាជធានីភ្នំពេញនៅល្ងាចថ្ងៃពុធនេះ ដែលបិទបាំងជិតមើលមិនឃើញអ្វីនៅខាងក្នុងទេ។
នៅថ្ងៃនេះដែរ សាលារាជធានីភ្នំពេញ និងអាជ្ញាធរមានសមត្ថកិច្ច បានត្រៀមកម្លាំងការពារសន្តិសុខជាង៤ ៦០០នាក់ សម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៦ ដែលប្រព្រឹត្តិទៅនៅថ្ងៃទី២៩ខែកក្កដាខាងមុខនេះ៕