ប្រជាពលរដ្ឋខ្មែរដែលកំពុងរស់នៅសហរដ្ឋអាមេរិកបានប្រកាសថា ពួកគេនឹងរៀបចំការតវ៉ានៅថ្ងៃទី២៨ ខែកក្កដា ប្រឆាំរដ្ឋាភិបាលចិនដោយចោទថា ចិនកំពុងតែគាំទ្ររដ្ឋាភិបាលបច្ចុប្បន្នឆ្ពោះទៅរកចំណុចដែលមានភាពអន្តរាយដូចកម្ពុជាកាលពីអតីតកាល។
ក្នុងសេចក្តីប្រកាសព័ត៌មានចុះថ្ងៃទី២៤ កក្កដា ដែលផ្ញើមកកាន់VOD អ្នករៀបចំធ្វើបាតុកម្មលោក សារ៉ូ សុវិជ័យ បានឲ្យដឹងថា ការតវ៉ានោះធ្វើនៅមុខស្ថានទូតចិនក្នុងទីក្រុងវ៉ាស៊ីនតោន ដោយកំណត់យកថ្ងៃទី២៨ ខែកក្កដា ចាប់ពីម៉ោង១០ព្រឹករហូតដល់១២ថ្ងៃត្រង់។
មូលហេតុនៃការប្រមូលផ្តុំនេះ ទាមទារឲ្យរដ្ឋាភិបាលចិនបញ្ឈប់ការគាំទ្រដល់រដ្ឋាភិបាលកម្ពុជា ដែលកំពុងដឹកនាំឆ្ពោះទៅរករបបខ្មែរក្រហមឡើងវិញ។ ក្រុមនេះក៏ទាមទារឲ្យចិនប្រកាសមិនទទួលស្គាល់លទ្ធផលនៃការបោះឆ្នោតថ្ងៃទី២៩ ខែកក្កដានេះ ដោយថា ជាការបោះឆ្នោតក្លែងក្លាយ។
អ្នកនាំពាក្យគណកម្មាធិការជាតិរៀបចំការបោះឆ្នោតលោក ហង្ស ពុទ្ធា ពុំចាប់អារម្មណ៍ចំពោះការធ្វើបាតុកម្មទាមទារនេះទេ ដោយថាវាជាសេរីភាពបញ្ចេមតិរបស់ពលរដ្ឋ មិនប៉ះពាល់ដល់ដំណើរការ គ.ជ.ប និងការសម្រេចចិត្តរបស់ប្រទេសចិនចំពោះ គ.ជ.ប នោះទេ។
ចាប់តាំងពីតុលាការកំពូលប្រកាសសាលដីការំលាយបក្សសង្គ្រោះជាតិកាលពីចុងឆ្នាំមុនមក ជំនួយនានារបស់សហរដ្ឋអាមេរិក និងសហភាពអឺរ៉ុបមកកាន់ គ.ជ.ប ត្រូវបានព្យួរជាបន្តបន្ទាប់ តែស្របពេលដែលលោកសេរីចាប់ផ្តើមកាត់បន្ថយនេះ ជំនួយពីប្រទេសចិនហាក់មានកំណើនកាន់តែច្រើនឡើង ខណៈដែលប្រទេសនេះក៏ប្រកាសទទួលស្គាល់ការបោះឆ្នោតខាងមុខនេះផង។
កាលពីខែធ្នូ ឆ្នាំ២០១៧ ប្រទេសចិនបានផ្តល់សម្ភារ៣០មុខដល់ស្ថាប័ន គ.ជ.ប ដែលរួមមាន កុំព្យូទ័រជាង១០០គ្រឿង វិទ្យុទាក់ទង៥៥០គ្រឿង កាមេរ៉ា៣០គ្រឿង ម៉ាស៊ីនបញ្ចាំងស្លាយ២គ្រឿង ម៉ាស៊ីនថតចម្លង៣គ្រឿង ម៉ាស៊ីនព្រីន៧គ្រឿង តុកៅអីការិយាល័យ ទូដាក់សម្ភារ ប្រអប់ដាក់សន្លឹកឆ្នោត១ម៉ឺន៥ពាន់ប្រអប់ បន្ទប់សម្ងាត់សម្រាប់បោះឆ្នោតចំនួន៦ម៉ឺន ព្រមទាំងសម្ភារបរិក្ខារចាំបាច់ផ្សេងៗទៀត ដើម្បីបម្រើដល់ការបោះឆ្នោត៕
