សាលារាជធានីភ្នំពេញ ប្រកាសផ្អាកការដឹកជញ្ជូនតាមរថយន្តក្រុងសាធារណៈចំនួនមួយថ្ងៃនៅថ្ងៃទី ២៩ ខែកក្កដា ខាងមុខនេះ ដើម្បីទុកពេលឲ្យបុគ្គលិកស្ថាប័ននេះបានទៅបោះឆ្នោត។
យោងតាមសេចក្ដីប្រកាសព័ត៌មានរបស់រដ្ឋបាលរាជធានីភ្នំពេញ ចេញផ្សាយថ្ងៃទី២៤ ខែកក្កដា រដ្ឋបាលរាជធានីភ្នំពេញនឹងផ្អាកសេវាដឹកជញ្ជូនសាធារណៈរថយន្ដក្រុង ចំនួន០១ ថ្ងៃ គឺថ្ងៃអាទិត្យ ត្រូវនឹងថ្ងៃទី២៩ ខែកក្កដា ហើយនឹងដាក់ដំណើរការឡើងវិញនៅថ្ងៃទី ៣០ ខែកក្កដា។
ក្នុងសេចក្ដីប្រកាសព័ត៌មានដដែលបានអះអាងថា ការផ្អាកនេះដើម្បីឲ្យបុគ្គលិកនៅស្ថាប័នដឹកជញ្ជូននេះ បានទៅបោះឆ្នោត។
ការបោះឆ្នោតជ្រើសតាំងតំណាងរាស្រ្ដ នីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ដោយមានគណបក្សនយោបាយចំនួន២០ ចូលរួមប្រកួតប្រជែង។