មន្ត្រីជាន់ខ្ពស់ក្រសួងធម្មការនិងសាសនាឲ្យដឹងថា ថ្នាក់ដឹកនាំក្រសួង និងមន្ត្រីគណៈសង្ឃ បានណែនាំអប់រំព្រះសង្ឃជាស្ថាបនិកគណបក្សសញ្ជាតិកម្ពុជា ជុំវិញករណីព្រះតេជគុណចូលរួមសកម្មភាពនយោបាយ និងបានថ្លែងវាយប្រហារស្ថាប័នផ្សេងៗ។
លោក សេង សុមុនី អ្នកនាំពាក្យក្រសួងធម្មការ និងសាសនាបានឲ្យប្រាប់វីអូឌីនៅថ្ងៃនេះថា ចំពោះបញ្ហារឿងព្រះតេជគុណ ហង្ស ដារ៉ា គឺជារឿងបុគ្គល ប៉ុន្តែខាងគណៈសង្ឃ និងក្រសួងក៏បានធ្វើយន្តការណ៍សម្រាប់ទម្រង់ទិសរួចមកហើយ។
លោក សេង សុមុនី អ្នកនាំពាក្យក្រសួងធម្មការ និងសាសនា
លោកបានបន្តថា ក្រសួងក៏មានការស្នើសុំឲ្យខាងគណៈសង្ឃពិនិត្យ បន្ទាប់ពីគណៈសង្ឃធ្វើការពិនិត្យភ្លាមហើយ ស្ថានការណ៍ក៏មានការប្រែប្រួលមកវិញ ដោយឃើញថាព្រះអង្គ ហង្ស ដារ៉ា មានលក្ខណៈស្លូតជាងមុន។
លោក សេង សុខេង ប្រធានគណបក្សសញ្ជាតិកម្ពុជា បានប្រាប់វីអូឌីថា ព្រះអង្គមានសង្ឃដីកានៅថ្ងៃឃោសនាគឺមិនខុសទេ ព្រោះព្រះតេជគុណក៏ជាពលរដ្ឋម្នាក់ដែលមានសិទ្ធិក្នុងការបញ្ចេញមតិយោបល់ដែរ ហើយព្រះតេជគុណក៏ជាប្រធានស្ថាបនិកនៃគណបក្ស ប៉ុន្តែព្រះអង្គមិនបានឈរឈ្មោះនោះទេ។
លោក សេង សុខេង ប្រធានគណបក្សសញ្ជាតិកម្ពុជា
លោក សេង សុខេង ក៏បានបដិសេធថា មិនមានស្ថាប័នណាមួយមានចំណាត់ការអ្វីលើព្រះតេជគុណ ហង្ស ដារ៉ា នោះទេ។
កាលពីថ្ងៃទី១៨ ខែកក្កដា ព្រះតេជគុណ ហង្ស ដារ៉ា បានបញ្ចេញប្រតិកម្មទៅលើវិទ្យុអាស៊ីសេរី និងអ្នកកាសែតអាមេរិកដែលចោទប្រកាន់បក្សព្រះតេជគុណជាគណបក្សដែលឃោសនាឲ្យគណបក្សប្រជាជនកម្ពុជា។
ព្រះតេជគុណ ហង្ស ដារ៉ា
ចំពោះបញ្ហានេះ លោក ប៉ា ច័ន្ទរឿន ប្រធានមជ្ឈមណ្ឌលទស្សនវិជ្ជាអនុវត្ត និងសីលធម៌កម្ពុជាបានឲ្យដឹងថា ទង្វើដែលព្រះសង្ឃ ហង្ស ដារ៉ាធ្វើជាទង្វើដែលប៉ះពាល់ដល់សង្គមផង និងប៉ះពាល់ដល់តម្លៃព្រះពុទ្ធសាសនាផងដែរ។
លោក ប៉ា ច័ន្ទរឿន ប្រធានមជ្ឈមណ្ឌលទស្សនវិជ្ជាអនុវត្ត និងសីលធម៌កម្ពុជា
គួរបញ្ជាក់ផងដែរ ព្រះតេជគុណ ហង្ស ដារ៉ា ប្រធានស្ថាបនិកនៃគណបក្សសញ្ជាតិកម្ពុជា ត្រូវបានអ្នកបណ្តាញសង្គមហ្វេសប៊ុករិះគន់ បន្ទាប់ពីព្រះអង្គបានរិះគន់ និងជេរវិទ្យុអាស៊ីសេរី និងកាសែតបរទេស នៅកំឡុងពេលព្រះអង្គកំពុងធ្វើការឃោសនាបោះឆ្នោត កាលពីថ្ងៃទី១៨ ខែកក្កដា ឆ្នាំ២០១៨។
