រដ្ឋាភិបាលសហរដ្ឋអាមេរិកនឹងមិនបញ្ចូនអ្នកសង្កេតការណ៍ណាម្នាក់មកឃ្លាំមើលការបោះឆ្នោតជាតិ២០១៨ នៅកម្ពុជានោះទេ ដោយសារស្ថានភាពនយោបាយនៅកម្ពុជា។
ស្ថានទូតសហរដ្ឋអាមេរិកនៅកម្ពុជាបានចេញសេចក្តីប្រកាសព័ត៌មាន នៅថ្ងៃទី២៥ ខែកក្កដា ឆ្នាំ២០១៨ឲ្យដឹងថា រដ្ឋាភិបាលសហរដ្ឋអាមេរិក នឹងមិនបញ្ជូនភ្ញៀវឬអ្នកសង្កេតការណ៍ផ្លូវការណាម្នាក់ មកពីរដ្ឋាភិបាលសហរដ្ឋអាមេរិក ដើម្បីចូលរួមសង្កេតការបោះឆ្នោតជាតិ នៅកម្ពុជា នៅថ្ងៃទី២៩ ខែកក្កដា ឆ្នាំ២០១៨នោះទេ។
នៅក្នុងសេចក្តីថ្លែងការណ៍បានលើកឡើងថា ការសម្រេចមិនបញ្ជូនអ្នកសង្កេតការណ៍ គឺស្របតាមសេចក្តីថ្លែងការណ៍របស់សហរដ្ឋអាមេរិក ក្នុងខែវិច្ឆិកា ឆ្នាំ២០១៧ ដែលបានសម្តែងកង្វល់យ៉ាងជ្រាលជ្រៅចំពោះការវិវត្តផ្នែកនយោបាយនៅប្រទេសកម្ពុជា។
គណៈកម្មាធិការជាតិរៀបចំការបោះឆ្នោតបានបិទការទទួលចុះឈ្មោះអ្នកសង្កេតការណ៍ជាតិនៅថ្ងៃទី១៨ ខែកក្កដា ឆ្នាំ២០១៨ ដោយទទួលស្គាល់អ្នកសង្កេតការណ៍ជាតិជិត ៨០ ០០០ នាក់ ប៉ុន្តែអង្គការឃ្លាំមើលបោះឆ្នោតមួយចំនួនមិនបានចុះឈ្មោះនោះទេ។
គិតត្រឹមថ្ងៃទី២៤ ខែកក្កដា ឆ្នាំ២០១៨ មានអ្នកសង្កេតការណ៍អន្តរជាតិជាង ២០០នាក់ ក្នុងនោះក៏មានអ្នកសង្កេតការណ៍មកពីប្រទេសចិនផងដែរ។