អតីតសមាជិកគណបក្សសង្រ្គោះជាតិ៥នាក់ត្រូវបានពិន័យជាប្រាក់ក្នុងម្នាក់ៗចំនួន ១០លានរៀល ដោយសារតែពួកគេធ្វើយុទ្ធនាការម្រាមដៃស្អាត។
លោក វន ពន ប្រធានគណៈកម្មាធិការរៀបចំការបោះឆ្នោតខេត្តបាត់ដំបង បានឲ្យដឹងថា គណៈកម្មាធិការរៀបចំការបោះឆ្នោតខេត្តនេះ បានសម្រេចធ្វើការផាកពិន័យជាទឹកប្រាក់ទៅលើអតីតសមាជិកបក្សប្រឆាំងទាំង៥នាក់ យោងតាមមាត្រា ១៤២ ជំពូកទី១០ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ។ លោកបន្តថាចំពោះករណីដែលអតីតសមាជិកបក្សប្រឆាំងទាំង៥នាក់មិនសុខចិត្ត ពួកគេអាចដាក់ពាក្យតវ៉ាបាននៅអំឡុងរយៈពេល០៣ថ្ងៃ។
អតីតសមាជិកបក្សប្រឆាំងទាំង៥នាក់នោះ រួមមាន៖ លោក ជា ជីវ, លោក ថោង សារឿន, លោក ម៉ាង ឈុន, លោក ពៅ តាំង និងលោក គ្រុយ គឹមសាំង។
គួរបញ្ជាក់ផងដែរ មន្ត្រីបក្សអំណាចបានប្តឹងទៅ គ.ជ.ប ក្រោយពេលដែលអតីតមន្ត្រីគណបក្សសង្គ្រោះជាតិនៅក្នុងខេត្តបាត់ដំបងបានបង្ហោះតាមបណ្តាញសង្គមហ្វេសប៊ុករបស់ខ្លួន ដោយពាក់ព័ន្ធនឹងម្រាមដៃស្អាត កាលពីថ្ងៃសុក្រសប្តាហ៍មុន។