ក្រុមហ៊ុនឆ្នោតមួយបានបកស្រាយចំពោះការជូនដំណឹងរបស់ខ្លួនទៅលើវិធានការចំពោះបុគ្គលិកប្រសិនជាពុំមានស្នាមប្រឡាក់ទឹកថ្នាំបោះឆ្នោតថាជាការយល់ច្រលំ និងសុំទោសចំពោះការជូនដំណឹងបែបនេះ។
កាលពីថ្ងៃទី២៦ កក្កដា ក្រុមហ៊ុនឆ្នោត KPW បានចេញសេចក្តីប្រកាសមួយដោយព្រមានកាត់ប្រាក់ខែបុគ្គលិកដែលឈប់សម្រាក៣ថ្ងៃនាថ្ងៃបោះឆ្នោតដោយហើយត្រលប់មកវិញដោយម្រាមដៃចង្អុលគ្មានប្រលាក់ទឹកថ្នាំបោះឆ្នោតនោះ។
ជំនួយការរដ្ឋបាលនៃក្រុមហ៊ុននេះ លោក ជី សេង បានឲ្យVOD ដឹងថាការផ្សព្វផ្សាយបែបនេះគឺដោយសារក្រុមហ៊ុនមានការយល់ច្រឡំចំពោះនីតិវិធីបោះឆ្នោតឆ្នាំ២០១៨នេះ ដោយសារកាលពីកន្លងទៅរដ្ឋាភិបាលពុំបានចេញសេចក្តីប្រកាសឲ្យឈប់សម្រាក៣ថ្ងៃដូចឆ្នាំនេះទេ។ ទោះជាយ៉ាងណាលោកថាក្រុមហ៊ុនបានចេញសេចក្តីជូនដំណឹងថ្មីរួចហើយ និងបានសុំទោសចំពោះការយល់ច្រឡំនេះផងដែរ។
ជំនួយការរដ្ឋបាលនៃក្រុមហ៊ុនឆ្នោត KPW លោក ជី សេង
ការបោះឆ្នោតថ្នាក់ជាតិជ្រើសតាំងតំណាងរាស្ត្រអាណត្តិទី៦នឹងចាប់ផ្តើមនៅថ្ងៃទី២៩កក្កដាខាងមុខ ខណៈដែលក្រសួងការងារប្រកាសឲ្យមានការឈប់សម្រាករយៈពេល៣ថ្ងៃចាប់ពីថ្ងៃទី ២៨ កក្កដា ដល់ថ្ងៃទី៣១ ដើម្បីអនុញ្ញាត្តិឲ្យកម្មករនិយោជិតបានចូលរួមបោះឆ្នោត។
គណកម្មាធិការជាតិរៀបចំការបោះឆ្នោតបានបញ្ជាក់ថាការបោះឆ្នោតគឺជាសិទ្ធិរបស់ប្រជាពលរដ្ឋ ហើយគ្មានបុគ្គលណា ឬស្ថាប័នណាអាចចាប់បង្ខំ ឬរារាំងឲ្យពលរដ្ឋទៅបោះ ឬមិនបោះនោះទេ៕
