គណៈកម្មការធិការជាតិរៀបចំការបោះឆ្នោត បានអំពាវនាវដល់គ្រប់គណបក្សនយោបាយត្រូវបញ្ឈប់ការឃោសក្នុងរយៈពេល ២៤ម៉ោង មុនថ្ងៃបោះឆ្នោត។
យោងតាមសេចក្ដីអំពាវនាវរបស់ គ.ជ.ប បានឲ្យដឹងថា គ្រប់គណបក្សនយោបាយ បេក្ខជន ភ្នាក់ងារគណបក្សនយោបាយ អ្នកគាំទ្រគណបក្សនយោបាយ រួមនឹងអ្នកគ្រប់បណ្ដាញផ្សព្វផ្សាយព័ត៌មានគ្រប់ប្រភេទ ត្រូវរក្សាភាពស្ងប់ស្ងាត់ចាប់ពីម៉ោង ១២:០០ យប់ ថ្ងៃទី២៧ រហូតដល់ ម៉ោង ១២:០០ យប់ថ្ងៃទី២៩ ខែកក្កដា ឆ្នាំ២០១៨ ដើម្បីចូលរួមគោរពច្បាប់ពីការបោះឆ្នោតជ្រើសតាំងតំណាងរាស្រ្ដ បទបញ្ជា និងនីតិវិធី រួមទាំងក្រមសីលធម៌ផងដែរ។
ប្រភពដដែលបន្ថែមថា អាជ្ញាធរគ្រប់លំដាប់ថ្នាក់ នឹងទទួលខុសត្រូវការងារសន្ដិសុខ សណ្ដាប់ធ្នាប់សាធារណៈ និងរបៀបរៀបរយនៅក្នុងដំណាក់កាលនេះ ជាពិសេសក្នុងការចាត់វិធានការយ៉ាងម៉ឺងម៉ាត់ដើម្បីបង្ការ និងទប់ស្កាត់នូវរាល់សកម្មភាព និងបាតុកម្មទាំងឡាយ ដែលមានបំណងបំផ្លាញការបោះឆ្នោត តាមរយៈការប្រើប្រាស់គ្រប់មធ្យោបាយទុច្ចរិត រារាំងមិនអោយប្រជាពលរដ្ឋមិនអោយទៅបោះឆ្នោត ធ្វើអោយមានការភាន់ច្រឡំ នាំអោយបាត់ទំនុកចិត្តលើការបោះឆ្នោត បង្កការរំខានមិនអោយដំណើរការបោះឆ្នោត និងរាប់សន្លឹកឆ្នោតបាន។
គ.ជ.ប ក៏បានព្រមានថានឹងមានវិធានការយ៉ាងម៉ឺងម៉ាត់ ចំពោះសកម្មភាពទាំងឡាយណា ដែលរំលោភលើច្បាប់ស្ដីពីការបោះឆ្នោតជ្រើសតាំងតំណាងរាស្រ្ដរបស់ គ.ជ.ប។