ថ្ងៃទី២៧ ខែកក្កដានេះ គឺជាថ្ងៃចុងក្រោយដែលគណបក្សនយោបាយទាំងអស់ធ្វើយុទ្ធនាការឃោសនារកការគាំទ្រពីប្រជាពលរដ្ឋសម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៦ ដែលប្រព្រឹត្តិទៅនៅថ្ងៃអាទិត្យចុងសប្តាហ៍នេះ។
គណបក្សប្រជាជនកម្ពុជាជ្រើសរើសយកកន្លែងជួបជុំអ្នកគាំទ្រ ចាប់ពីកោះពេជ្ររហូតដល់មុខវត្តបុទុមវតីដែលមានចម្ងាយប្រមាណ១គីឡូម៉ែត្រ។
តាមរបាយការណ៍ដែលគណបក្សប្រជាជនកម្ពុជាដាក់ទៅគណៈកម្មាធិការជាតិរៀបចំការបោះឆ្នោតគឺអ្នកចូលរួមមានចំនួន២៥ម៉ឺននាក់។
ចំនួននេះច្រើនជាងគណបក្សផ្សេងៗ ដែលធ្វើយុទ្ធនាការធំសម្រាប់ការស្វែងរកសំឡេងគាំទ្រពីប្រជាពលរដ្ឋនៅថ្ងៃចុងក្រោយនេះដែរ។
ចាប់តាំងពីម៉ោង៥ព្រឹករថយន្តតូចធំ ដឹកអ្នកគាំទ្រដែលមានពាក់មួកនិងអាវគណបក្សប្រជាជនកម្ពុជាចេញពីផ្លូវនានាសំដៅទៅកន្លែងជួបជុំគ្នានៅកោះពេជ្រនិងមុខវត្តបទុមវតី។ អ្នកគាំទ្រទាំងនោះ ខ្លះកាន់ទង់បក្ស ខ្លះកាន់ទង់ជាតិ ខ្លះគ្រវី និងស្រែកហ៊ោ បើទោះជាទៅមិនទាន់ដល់កន្លែងជួបជុំគ្នាក៏ដោយ។
តាំងពីមុនម៉ោង៦ព្រឹកផ្លូវមួយចំនួននៅជុំវិញកន្លែងជួបជុំគ្នារបស់គណបក្សប្រជាជនកម្ពុជា ត្រូវបិទទាំងស្រុង ឬកន្លែងខ្លះអនុញ្ញាតឲ្យតែរថយន្តឬ មធ្យោបាយដឹកជញ្ជូនសកម្មជនបក្សឬអ្នកធ្វើការនៅកន្លែងនោះតែប៉ុណ្ណោះដែលអាចចូលទៅបាន សម្រាប់អ្នកដែលត្រូវធ្វើដំណើរឆ្លងកាត់ឬ រថយន្តឈ្នូលមិនអនុញ្ញាតឲ្យឆ្លងកាត់នោះទេ។
ព្រឹកព្រលឹមពន្លឺថ្ងៃមិនទាន់រះផងសំឡេងចម្រៀងគណបក្សឮទ្រហឹងចាប់ពីចំណុចវិមានឯករាជ្យ រហូតដល់កោះពេជ្រ។ ចំណែកអ្នកគាំទ្រគណបក្សនេះ ពាក់អាវនិងមួកពណ៌សដើរពាសពេញទីនោះ។
អ្នកគាំទ្រទាំងនោះស្ថិតនៅតាមក្រុមការងាររបស់ពួកគេដូចជា តំណាងតាមខណ្ឌ ឬ តាមតំបន់ផ្សេងៗទៀត។ កន្លែងខ្លះមានចាក់ចម្រៀងមានអ្នករាំ កន្លែងខ្លះមានការណែនាំពីវិន័យត្រៀមពេលលោកនាយករដ្ឋមន្ត្រីហ៊ុន សែនទៅដល់។
លោកនាយករដ្ឋមន្ត្រីហ៊ុន សែនទៅដល់វេទិកាទី១នៅកោះពេជ្រនៅម៉ោងជាង៧ព្រឹក លោកបានថ្លែងសារទៅកាន់អ្នកគាំទ្រ ហើយដើរដោយថ្នើរជើងឆ្ពោះទៅកាន់វេទិកាបន្តបន្ទាប់ដែលមានអ្នកគាំទ្រឈរអមដល់វត្តបុទុមវតី។
ចន្លោះពីវេទិកាទី១រហូតដល់វេទិកាចុងក្រោយ មានវេទិកាតូចជាច្រើនទៀតដោយកន្លែងខ្លះរៀបចំជាតន្ត្រី និងមានក្រុមការងារចាំជួយសង្គ្រោះបន្ទាន់ជាច្រើនកន្លែង អមដោយក្រុមរៀបចំការពារសន្តិសុខ។
មកដល់វេទិកានៅមុខវត្តបុទុមវតីលោកនាយករដ្ឋមន្ត្រីថ្លែងសារម្តងទៀតការថ្លែងសារនោះ ផ្តោតសំខាន់លើការជំរុញឲ្យពលរដ្ឋទៅបោះឆ្នោត ហើយបោះឲ្យគណបក្សប្រជាជនកម្ពុជា។
គណបក្សផ្សេងទៀតដូចជា គណបក្សសម្ព័ន្ធដើម្បីប្រជាធិបតេយ្យជួបជុំអ្នកគាំទ្រនៅចំណុចផ្លូវ៦០ម៉ែត្រ គណបក្សហ្វ៊ុនស៊ិនប៉ិចជួបជុំគ្នានៅមុខវត្តចាស់ត្រើយខាងកើតទន្លេ គណបក្សសញ្ជាតិកម្ពុជាជួបជុំគ្នានៅសួនប្រជាធិបតេយ្យនៅបណ្តោយផ្លូវជាតិលេខ៥។
ទាំងគណបក្សប្រជាជនកម្ពុជានិងគណបក្សនយោបាយផ្សេងៗទៀត បន្ទាប់ពីជួបជុំគ្នាហើយស្តាប់សាររបស់ថ្នាក់ដឹកនាំបក្សរួចពួកគេចាប់ផ្តើមហែក្បួនក្នុងរាជធានីភ្នំពេញ។
ស្ទើរគ្រប់ផ្លូវក្នុងរាជធានីមានក្បួនហែបក្សឆ្លងកាត់ ដោយគណបក្សខ្លះទៅទាំងក្រុមធំ គណបក្សខ្លះទៀតបែងចែកគ្នាតាមផ្លូវតួចៗ។
ដោយឡែកគណបក្សប្រជាធិបតេយ្យមូលដ្ឋានជ្រើសរើសការជួបជុំគ្នានៅខេត្តសៀមរាប។ គណបក្សនេះជួបជុំគ្នានៅបរិវេណប្រសាទបាគង នៅពេលរសៀលដើម្បីធ្វើពិធីបួងសួង និងថ្លែងអំណរគុណដល់បុព្វបុរសដែលបានកសាងទឹកដី បន្ទាប់មកគណបក្សហែក្បួនឃោសបន្តនៅសៀមរាប។
ចំណែកគណបក្សមួយចំនួនទៀត មិនបានធ្វើសកម្មភាពជាទ្រង់ទ្រាយធំទេ គ្រាន់តែចុះជួបអ្នកគាំទ្រ ឬ ធ្វើសកម្មភាពផ្សព្វផ្សាយតាមហ្វេសប៊ុកតែប៉ុណ្ណោះ។
ការឃោសនារកសំឡេងឆ្នោតមានរយៈពេល២១ថ្ងៃគឺចាប់ពីថ្ងៃទី៧ដល់ថ្ងៃទី២៧ខែកក្កដា ចំណែកថ្ងៃទី២៨គឺជាថ្ងៃ ស មិនឲ្យមានការឃោសនាទេ ត្រៀមសម្រាប់បោះឆ្នោតថ្ងៃទី២៩ ខែកក្កដាដដែល។