​អតីតបក្សប្រឆាំងធ្វើបាតុកម្មនៅក្រៅប្រទេស​ស្នើអន្ដរជាតិកុំទទួលស្គាល់រដ្ឋាភិបាលកើតក្រោយបោះឆ្នោត

អតីតគណបក្សប្រឆាំងបាន និងកំពុងធ្វើបាតុកម្មទ្រង់ទ្រាយធំនៅតាមបណ្ដាប្រទេសនានា ដោយសុំកុំឲ្យពួកគេទទួលស្គាល់លទ្ធផលនៃការបោះឆ្នោតនៅកម្ពុជា ប៉ុន្ដែ អ្នកនាំពាក្យបក្សកាន់អំណាច និង គ.ជ.ប ហាក់មិនចាប់អារម្មណ៍នឹងការអំពាវនាវនេះនោះទេ។

នៅថ្ងៃបោះឆ្នោតនេះ ប្រជាពលរដ្ឋខ្មែរ និងក្រុមអ្នកគាំទ្រអតីតនៅក្រៅប្រទេស បានតវ៉ាប្រឆាំងនឹងការបោះឆ្នោតនៅកម្ពុជា ដែលគ្មានវត្តមាន​អតីតគណបក្សប្រឆាំងខ្លួនចូលរួម។ ​ក្រុមបាតុករទាំងនោះបានប្រមូលផ្ដុំ​គ្នារាប់​ពាន់នាក់ ​នៅតាមបណ្ដាប្រទេសកាន់លទ្ធិប្រជាធិបតេយ្យ​ធំៗ​លើពិភពលោក ដូចជា កូរ៉េ បារាំង ស្វីស ជប៉ុន អូស្ដ្រាលី កាណាដា និងសហរដ្ឋអាមេរិកជាដើម​​។

អតីតតំណាងរាស្ដ្រគណបក្សសង្គ្រោះជាតិ​ លោក យ៉ែម បុញ្ញ​ឬ​ទ្ធិ ដែលដឹកនាំក្បួនបាតុកម្មនៅប្រទេសកូរ៉េនៅថ្ងៃនេះ បានថ្លែងថា អតីតគណបក្សប្រឆាំងមួយនេះនឹងបន្ដការតវ៉ានៅក្រៅប្រទេស។ លោកថា ការបោះឆ្នោតនៅអាណត្តិទី៦នេះ គឺផ្ទុយពីគោលការណ៍ប្រជាធិបតេយ្យសេរីពហុបក្ស ដូចមានចែងក្នុងរដ្ឋធម្មនុញ្ញ និងកិច្ចព្រមព្រៀងសន្ដិភាពទីក្រុងប៉ារីស។

សកម្មជនអតីតគណបក្សសង្រ្គោះជាតិ លោក ហៃ វណ្ណា ប្រាប់ VOD ផងដែរថា ពលរដ្ឋខ្មែររាប់ពាន់នាក់នៅប្រទេសជប៉ុន បានតវ៉ាប្រឆាំងនឹងការបោះឆ្នោតនៅក្នុងប្រទេសកម្ពុជា និងត្រៀមដាក់ញត្តិដើម្បីសុំឲ្យរដ្ឋាភិបាលជប៉ុន កុំទទួលស្គាល់លទ្ធផលនៃការបោះឆ្នោត​ និងរដ្ឋាភិបាលកើតក្រោយការបោះឆ្នោតនេះ។

អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា គណបក្សកាន់អំណាចមួយនេះមិនចាប់អារម្មណ៍នឹងសកម្មភាពរបស់អតីតបក្សប្រឆាំងនៅក្រៅប្រទេសឡើយ ដោយថា មានពលរដ្ឋកម្ពុជានោះទេ ដែលជាអ្នកសម្រេចជោគវាសនាប្រទេសជាតិ។

អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា មានប្រសាសន៍ថា អតីតបក្សប្រឆាំងបានទទួលបរាជ័យក្នុងការកៀងគរកុំឲ្យប្រជាពលរដ្ឋចេញទៅបោះឆ្នោត។

លោកថា​ ការបោះឆ្នោតនេះបានអនុវត្តទៅតាមច្បាប់ និងគោលការណ៍ប្រជាធិបតេយ្យ ដោយលោកសំអាងទៅលើរបាយការណ៍ គ.ជ.ប ដែលថា​ មានពលរដ្ឋខ្មែរចេញទៅបោះឆ្នោតប្រមាណជាង ៧០ភាគរយបានចេញទៅបោះឆ្នោត។

ប្រទេសលោកសេរីមួយចំនួន រួមមាន សហរដ្ឋអាមេរិក សហភាពអឺរ៉ុប អង្គការសហប្រជាជាតិ និងក្រុមអង្គការសិទ្ធិមនុស្សអន្ដរជាតិ បានព្រមានពីការមិនទទួលស្គាល់លទ្ធផលនៃការបោះឆ្នោតនេះ បន្ទាប់ពីអតីតបក្សប្រឆាំងដ៏ធំមួយ ត្រូវបានតុលាការកំពូលរំលាយនៅមុនការបោះឆ្នោត។

ក្រុមអ្នកសង្កេតការណ៍ជាតិ និងអន្ដរជាតិមួយចំនួន ក៏បានប្រកាសមិនដាក់អ្នកសង្កេតការណ៍របស់ខ្លួនផងដែរ ដូចជា អង្គការ ខុមហ្វ្រែល អង្គការតម្លាភាពកម្ពុជា អង្គការណិចហ្វិច សហរដ្ឋអាមេរិក សហភាពអឺរ៉ុប និងប្រទេសជប៉ុនជាដើម៕