គណៈកម្មាធិការជាតិរៀបចំការបោះឆ្នោតបានប្រកាសថា លទ្ធផលចំនួនអ្នកទៅបោះឆ្នោតឆ្នាំ២០១៨នេះ ជាការឆ្លើយតបយ៉ាងសមស្របចំពោះចលនាបក្សប្រឆាំងនៅក្រៅប្រទេសដែលតែងតែជំរុញពលរដ្ឋកុំឲ្យទៅបោះឆ្នោត។
លទ្ធផលបឋមនៃចំនួនអ្នកទៅបោះឆ្នោតនៅទូទាំងប្រទេស ថាមានចំនួនជាង៦លាននាក់ដែលស្មើនឹង៨២,១៧ភាគរយនៃអ្នកដែលមានឈ្មោះបោះឆ្នោតសរុប។
ប្រធានគណៈកម្មាធិការជាតិរៀបចំការបោះឆ្នោតលោក ស៊ិក ប៊ុនហុក មានប្រសាសន៍ក្នុងកិច្ចប្រជុំសរុបព្រឹត្តិការណ៍ទូទៅនៃការបោះឆ្នោតថ្ងៃទី២៩ កក្កដានេះថា ចំនួនអ្នកចូលរួមបោះឆ្នោតនៅថ្ងៃនេះគឺបានឆ្លើយតបយ៉ាងសាកសម ចំពោះចលនាសង្គ្រោះជាតិ និងអន្តរជាតិមួយចំនួនដែល ជំរុញពលរដ្ឋកុំឲ្យបោះឆ្នោត និងថាជាការបោះឆ្នោតដែលក្លែងក្លាយនោះ។
ប្រធានគណៈកម្មាធិការជាតិរៀបចំការបោះឆ្នោតលោក ស៊ិក ប៊ុនហុក
ទោះជាយ៉ាងណាលោកស៊ិក ប៊ុនហុក មិនទាន់អាចបញ្ជាក់ពីចំនួនសន្លឹកឆ្នោតបានការប៉ុន្មាន និងមិនបានការប៉ុន្មាននោះទេ។
នៅថ្ងៃនេះ ប្រជាពលរដ្ឋខ្មែរ និងក្រុមអ្នកគាំទ្រអតីតបក្សប្រឆាំងនៅក្រៅប្រទេស បានប្រមូលផ្ដុំគ្នារាប់ពាន់នាក់ នៅតាមបណ្ដាប្រទេសកាន់លទ្ធិប្រជាធិបតេយ្យធំៗលើពិភពលោក ដូចជា កូរ៉េ បារាំង ស្វីស ជប៉ុន អូស្ដ្រាលី កាណាដា និងសហរដ្ឋអាមេរិក តវ៉ាទៅនឹងការការបោះឆ្នោតនេះដោយថាផ្ទុយពីគោលការណ៍ប្រជាធិបតេយ្យសេរីពហុបក្ស។
សហរដ្ឋអាមេរិក សហភាពអឺរ៉ុប អង្គការសហប្រជាជាតិ និងក្រុមអង្គការសិទ្ធិមនុស្សអន្ដរជាតិ បានព្រមានពីការមិនទទួលស្គាល់លទ្ធផលនៃការបោះឆ្នោតនេះ បន្ទាប់ពីគណបក្សសង្គ្រោះជាតិ ដែលជាបក្សប្រឆាំងធំមួយនៅកម្ពុជាត្រូវគេផាត់ចេញពីការបោះឆ្នោតនេះ៕